दौंड : दौंड तालुक्यातील केडगाव स्टेशन (बोरिपार्धी) येथे एका हॉस्पिटलवर आरोग्यविभागाच्या पथकाने तपासणी करुन दोन डॉक्टरांवर गुन्हा दाखल केला आहे मात्र या गुन्ह्याचा गिरी प्रकरणाशी संबंध नसल्याची माहिती तपास अधिकाऱ्यांनी दिली आहे.
यवत पोलिस ठाण्यात केडगाव स्टेशन (बोरिपार्धी) येथे असलेल्या लवंगरे मॅटर्निटी अँड इन्फर्टीलिटी हॉस्पिटल च्या डॉ.स्वाती लवंगरे तसेच उरुळी कांचन येथून येऊन लवंगरे हॉस्पिटल येथे कुटुंबनियोजन शस्त्रक्रिया करणारे स्त्री रोग तज्ज्ञ डॉ.तुकाराम यशवंत मोटे यांच्यावर गुन्हा दाखल करण्यात आला आहे. याबाबत डॉ.सचिन विठ्ठल गुजर (वैद्यकीय अधिक्षक, उपजिल्हा रुग्णालय दौंड) यांनी फिर्याद दिली आहे.
नेमका प्रकार काय.. गिरी प्रकरणाशी संबंध आहे काय..??
मिळालेल्या माहितीनुसार संपूर्ण दौंड तालुक्यात गर्भलिंग निदान प्रकरण गाजत असताना दौंड तालुक्यातील विविध हॉस्पिटलची तपासणी आरोग्यविभागाच्या पथकांकडून करण्यात येत आहे. अशीच तपासणी केडगाव स्टेशन (बोरिपार्धी ता.दौंड) हद्दीत असणाऱ्या लवंगरे मॅटर्निटी अँड इन्फर्टीलिटी हॉस्पिटलची करण्यात आली असता तेथे गर्भपाताच्या गोळ्या आढळून आल्या तसेच गर्भपात आणि कुटुंबनियोजन शस्त्रक्रिया करण्यात आल्याचे रजिस्टर आढळून आले.
यावेळी डॉ.लवंगरे या स्त्रीरोग तज्ज्ञ नसल्याने त्यांना गर्भपात करण्याचा किंवा गर्भपाताच्या गोळ्या ठेवण्याचा अधिकार नसल्याचा ठपका त्यांच्यावर ठेवण्यात आला आहे. त्यामुळे त्यांच्यावर गर्भपाताच्या गोळ्यांचा साठा करण्याचा व स्त्रीरोग तज्ज्ञ नसताना गर्भपात केल्याचा ठपका ठेवून त्यांच्यावर गुन्हा दाखल करण्यात आला आहे.
तर लवंगरे मॅटर्निटी अँड इन्फर्टीलिटी हॉस्पिटल येथे कुटुंब नियोजन शास्त्रक्रियेसाठी येणारे उरुळी कांचन येथील स्त्रीरोग तज्ज्ञ डॉ.तुकाराम यशवंत मोटे यांनी येथील रुग्णांना गर्भपाताच्या गोळ्या दिल्या असा रजिस्टरमध्ये उल्लेख असून त्यामध्ये त्यांची सही आहे असा ठपका त्यांच्यावर ठेवण्यात आला आहे. त्यामुळे गिरी प्रकरणात वरील या दोन डॉक्टरांचा समावेश नसल्याची माहिती मिळत आहे.
पुढील तपास यवतचे पोलिस निरीक्षक नारायण देशमुख यांच्या मार्गदर्शनाखाली केडगाव पोलिस चौकीचे पोलिस उपनिरीक्षक किशोर वागज हे करीत आहेत.
