दौंड : दौंड तालुक्यात सार्वजनिक शांतता व सुव्यवस्था भंग करणाऱ्यांवर यवत पोलिसांनी धडक कारवाई चालू ठेवली आहे. पाटस (ता. दौंड, जि. पुणे) येथील नागेश्वर मंदिरासमोर कोणतीही वैध परवानगी न घेता अतिशय मोठ्या आवाजात डी.जे. वाजवून उपद्रव केल्याप्रकरणी तिघा जणांवर गुन्हा दाखल करण्यात आला आहे. दिनांक १४/०९/२०२६ रोजी सायंकाळी ५.३० च्या सुमारास ही घटना घडली असून आरोपींनी वाहनामध्ये मोठ्या आवाजात डी.जे. लावून सार्वजनिक ठिकाणी नाचगाणे सुरू ठेवले होते. कर्तव्यदक्ष पोलिसांनी घटनास्थळी पोहोचत वारंवार सूचना देऊनही आरोपींनी उपद्रव सुरूच ठेवल्यानंतर पोलिसांनी कठोर कारवाई केली आहे.
या प्रकरणी पोलीस हवालदार राजकुमार मोहन कोकरे यांनी फिर्याद दिली असून, यवत पोलीस ठाण्यात भारतीय न्याय संहिता (BNS) २०२३ च्या कलम २९२ आणि २९३ नुसार आरोपी १) अविनाश बाबुराव जाधव (रा.कानगाव, ता. दौंड) २) गौरव बाळासो माखर (रा. पाटस, ता. दौंड), ३) अभिजित हनुमंत चव्हाण (रा. पाटस, ता. दौंड) यांच्यावर गुन्हा दाखल कारण्यात आला आहे. यावेळी पोलिसांनी दोन पंचांसमक्ष पंचनामा करून डी.जे. ध्वनीक्षेपकासह वाहन जप्तीची कारवाई केली आहे.
पुणे ग्रामीण पोलिसांचे नागरिकांना आवाहन :
सार्वजनिक ठिकाणी शांतता आणि सुव्यवस्था राखणे हे प्रशासनाचे प्राथमिक कर्तव्य असून, पुणे ग्रामीण पोलीस दलाच्या हद्दीत कोणत्याही व्यक्तीने, मंडळाने किंवा आयोजकांनी डी.जे. अथवा लेझर लाईटचा वापर केल्यास यापुढेही अशीच कठोर कायदेशीर कारवाई केली जाईल, असा इशारा यवत पोलिसांनी दिला आहे. डी.जे.चा भीषण आवाज आणि तीव्र लेझर लाईट्समुळे वृद्ध, आजारी व्यक्ती, लहान मुले आणि सामान्य नागरिकांच्या आरोग्यावर तसेच डोळ्यांवर गंभीर परिणाम होत असल्याने सर्व नागरिक, उत्सव मंडळे आणि डी.जे. चालकांनी कायद्याचे नियम पाळून पोलिसांना सहकार्य करावे, असे आवाहन पोलीस प्रशासनाकडून करण्यात आले आहे.
