अब्बास शेख
बोरिपार्धी, चौफुला : श्री शितळादेवी तरुण मंडळ चौफुला यांच्या वतीने आयोजित सार्वजनिक नवरात्र उत्सव २०२६ मध्ये यवत पोलीस स्टेशनचे पोलीस निरीक्षक संतोष तासगावकर यांच्या शुभहस्ते देवीची आरती संपन्न झाली. यावेळी त्यांनी मंडळाला शुभेच्छा देत नागरिकांना कायदा व सुव्यवस्था राखण्याचे महत्त्व पटवून दिले.
यावेळी पोलीस निरीक्षक संतोष तासगावकर यांनी बोलताना, कायदा व सुव्यवस्था राखणे ही केवळ पोलिसांची जबाबदारी नसून प्रत्येक नागरिकाचेही कर्तव्य आहे. महाराष्ट्रातील साडेतीन शक्तिपीठांचा संदर्भ देत त्यांनी आपल्या आईला पहिले, पत्नीला दुसरे, बहिणीला तिसरे आणि मुलीला अर्धे शक्तिपीठ मानून त्यांचा मनापासून आदर व सन्मान करावा, असा संदेश दिला. महिलांचा सन्मान, सुरक्षितता आणि प्रतिष्ठा जपली, तर समाज अधिक सुसंस्कृत, सुरक्षित आणि शांततापूर्ण होण्यास निश्चितच मदत होईल असा प्रेरणादायी विचार त्यांनी मांडला.
धार्मिक उत्सवांच्या माध्यमातून भक्तीबरोबरच सामाजिक प्रबोधन, महिला सन्मान आणि नागरिकांमध्ये कायद्याविषयी जागरूकता निर्माण करण्याचा मंडळाचा उपक्रम यावेळी विशेष महत्त्वाचा ठरला. चालू वर्षी श्री शितळादेवी तरुण मंडळाच्या वतीने नवरात्र उत्सवानिमित्त विविध सांस्कृतिक, प्रबोधनपर आणि धार्मिक कार्यक्रमांचे आयोजन करण्यात आले असून यामध्ये कीर्तन, भारूड, देवीच्या गीतांचा कार्यक्रम तसेच भव्य मिरवणूक सोहळा अशा विविध उपक्रमांचा समावेश आहे.
भक्ती, संस्कृती आणि सामाजिक प्रबोधन यांचा सुंदर संगम घडवून आणण्याचा मंडळाचा प्रयत्न असल्याची माहिती मंडळाचे मार्गदर्शक तुषार चोरमले यांनी दिली. या प्रसंगी गावचे पोलीस पाटील अविनाश शेंडगे पाटील, मंडळाचे अध्यक्ष ओंकार वत्रे, खजिनदार प्रसाद धायगुडे, कार्याध्यक्ष आकाश चोरमले, सचिव तुषार धायगुडे आणि समीर शितोळे उपस्थित होते.
