दौंड : दहीहंडी उत्सवादरम्यान सार्वजनिक रस्त्यावर वाहतुकीस अडथळा निर्माण करून समाजात दहशत व शांतता भंग होईल, अशा उद्देशाने सोशल मीडियावर आक्षेपार्ह मजकूर असलेली रील पोस्ट करणाऱ्या रेकॉर्डवरील आरोपी, त्यांचे साथीदार तसेच दहीहंडी आयोजकांवर पोलिसांनी कायदेशीर कारवाई केली असल्याची माहिती यवत पोलिसांनी दिली आहे.
दिनांक ९ सप्टेंबर २०२६ रोजी रात्री सुमारे ८ वाजण्याच्या सुमारास यवत पोलीस ठाण्याच्या हद्दीतील मौजे केडगाव, ता. दौंड, जि. पुणे येथे श्रीकृष्ण दहीहंडी उत्सवाचे आयोजन करण्यात आले होते. या कार्यक्रमाचे आयोजक शुभम प्रकाश टेळे (रा. टेळेवाडी, ता. दौंड) व रामकृष्ण आनंदा काळे (रा. बोरीपार्धी, ता. दौंड) यांनी जिल्हाधिकारी तथा जिल्हादंडाधिकारी पुणे यांच्या आदेशाचे उल्लंघन केल्याचे पोलिसांच्या निदर्शनास आले.
या प्रकरणात रेकॉर्डवरील आरोपी परशुराम उर्फ आबा केरू गडधे, नवनाथ पंढरीनाथ गायकवाड, गौरव उर्फ बंटी दिनेश पांढरे, युवराज राजाराम शिंदे, महेश मारुती दुले, विशाल दादासो गडधे, विशाल उर्फ अण्णा माकर, तसेच सौरभ कोळपे, अनिल शेंडगे व इतर १५ साथीदार यांना दहीहंडी कार्यक्रमासाठी आमंत्रित करण्यात आले होते.
या आरोपींनी चौफुला ते सुपा महामार्गावर वाहतुकीस अडथळा निर्माण करून समाजामध्ये दहशत निर्माण करण्याच्या उद्देशाने ‘किंग ऑफ दौंड’ या नावाने इन्स्टाग्रामवर रील पोस्ट केली. या रीलमध्ये, “कुछ दिन जंगल शांत क्या हुआ कुत्तों ने खुदको राजा समझ लिया, उन्हें क्या पता शेर जब वापस आता है तो दहाडता नहीं सीधा शिकार करता है” अशा आशयाचा मजकूर वापरण्यात आला होता.
या प्रकारामुळे सार्वजनिक शांतता व सुव्यवस्थेला धोका निर्माण होण्याची शक्यता असल्याने संबंधित आयोजक, आरोपी व त्यांच्या साथीदारांविरुद्ध भारतीय न्याय संहिता २०२३ मधील कलम २२३, २८५ तसेच महाराष्ट्र पोलीस अधिनियम १९५१ मधील कलम १३५ अन्वये गुन्हा दाखल करण्यात आला आहे.
सदर कारवाई पोलीस अधीक्षक संदीपसिंग गिल, अपर पोलीस अधीक्षक गणेश बिरादार, उपविभागीय पोलीस अधिकारी बापूराव दडस यांच्या मार्गदर्शनाखाली यवत पोलीस ठाण्याचे पोलीस निरीक्षक संतोष तासगावकर, सहायक पोलीस निरीक्षक सुधीर कदम, तपास पथकाचे पोलीस उपनिरीक्षक मारोती मेतलवाड तसेच पोलीस अंमलदार संदीप देवकर, रोंकी देवकाते, महेंद्र चांदणे, धिरज जाधव, प्रतीक जगताप, अमोल भुजबळ, मारुती बाराते, विनोद काळे, सचिन गुंड, दिनेश लोणकर व विनीत कुऱ्हाडे यांनी केली आहे.
