दौंड : घराच्या दरवाजाबाहेर अघोरी कृत्य किंवा जादूटोणा करण्याच्या उद्देशाने कुंकू लावलेला दगड, पांढरे अंडे, टाचण्या टोचलेली काळी बाहुली, लिंबू व लाल रंगाची पुडी ठेवून त्यानंतर महिलेला घराबाहेर ओढून तिची साडी ओढत विनयभंगाचा प्रयत्न केल्याप्रकरणी यवत पोलिसांनी एका व्यक्तीविरुद्ध गुन्हा दाखल केला आहे. याप्रकरणी ४८ वर्षीय महिलेने यवत पोलीस ठाण्यात फिर्याद दिली आहे. त्यानुसार अरुण रामभाऊ दोरगे (रा. आनंदग्राम सोसायटी, यवत) याच्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, ११ सप्टेंबर रोजी सकाळी ६ वाजता तसेच १२ सप्टेंबर रोजी मध्यरात्री १२.४५ वाजण्याच्या सुमारास यवत गावच्या हद्दीत फिर्यादी यांच्या घरासमोर हा प्रकार घडला. घराच्या दरवाजाबाहेर एका बॉक्समध्ये कुंकू लावलेला दगड, पांढरे अंडे, टाचण्या टोचलेली काळी बाहुली, लिंबू व लाल रंगाची पुडी ठेवलेली आढळून आली. या प्रकारामुळे परिसरात भीतीचे वातावरण निर्माण झाल्याचे फिर्यादीत नमूद आहे.
त्यानंतर आरोपी घराच्या दरवाजावर जोरजोराने लाथा मारत असताना फिर्यादी यांनी दरवाजा उघडला. त्यावेळी आरोपीने त्यांना बाहेर ओढून घेतले. फिर्यादी यांनी प्रतिकार केला असता आरोपीने त्यांची साडी ओढून मनास लज्जा उत्पन्न होईल असे कृत्य केल्याचे तक्रारीत म्हटले आहे. तसेच आरोपीने शिवीगाळ करून धमकी दिल्याचे फिर्यादीत नमूद केले आहे. फिर्यादीचे पती व दोन्ही मुले बाहेर आल्यानंतर आरोपी तेथून पळून गेल्याचे पोलिसांनी सांगितले.
यवत पोलीस ठाण्यात गुन्हा रजिस्टर क्रमांक ९३३/२०२६, भारतीय न्याय संहिता कलम ७४, ७६, ३५२, ३५१(२)(३) तसेच महाराष्ट्र नरबळी आणि इतर अमानुष, अनिष्ट व अघोरी प्रथा व जादूटोणा यांना प्रतिबंध घालण्याबाबत व त्यांचे समूळ उच्चाटन करण्याबाबतच्या अधिनियमातील कलम ३(२) अन्वये गुन्हा दाखल करण्यात आला असून या प्रकरणाचा अधिक तपास पोलीस निरीक्षक संतोष तासगांवकर करीत आहेत.
