डाळिंब : दौंड तालुक्यातील डाळिंब येथे भीमाशंकर खंडागळे यांच्या खून प्रकरणाचा यवत पोलीस आणि पुणे ग्रामीण स्थानिक गुन्हे शाखेने संयुक्त तपासातून छडा लावला आहे. या प्रकरणी विजय सुभाष लेचरूड (वय ४०, रा. डाळिंब, ता. दौंड) याला पोलिसांनी अटक केली आहे. ३ ऑक्टोबर रोजी सायंकाळी सहाच्या सुमारास डाळिंब येथील नंदा धोंडीबा खंडागळे (वय ५१) यांनी त्यांचा मुलगा भीमाशंकर धोंडीबा खंडागळे (वय ३५) याचे अज्ञात व्यक्तीने अपहरण केल्याची तक्रार यवत पोलीस ठाण्यात दिली होती. त्यानुसार गुन्हा दाखल करून तपास सुरू करण्यात आल्यानंतर हा खून वरील आरोपीने केल्याचे तपासात निष्पन्न झाले आहे.
पोलिसांकडून मिळालेल्या माहितीनुसार, दि. ८ ऑक्टोबर रोजी डाळिंब गावच्या हद्दीत रमेश म्हस्के यांच्या विहिरीत भीमाशंकर खंडागळे यांचा मृतदेह आढळून आला होता. तपासादरम्यान त्यांचा खून करून पुरावा नष्ट करण्याच्या उद्देशाने मृताचे हात-पाय मोठ्या दगडाच्या सहाय्याने लोखंडी तारेने बांधून मृतदेह विहिरीत टाकण्यात आल्याचे तपासात समोर आले. १५ ऑक्टोबर रोजी तपासादरम्यान संशयित विजय लेचरुड याला ताब्यात घेऊन चौकशी करण्यात आली. त्यावेळी भीमाशंकर खंडागळे याने शिवीगाळ केल्याच्या रागातून त्याचा गळा दाबून खून केल्याची कबुली आरोपीने देऊन त्यानंतर मृतदेहाचे हात-पाय लोखंडी तारेने मोठ्या दगडाला बांधून विहिरीत टाकल्याचे सांगितले.
सदरची कारवाई पुणे ग्रामीणचे पोलीस अधीक्षक संदीपसिंह गिल, अपर पोलीस अधीक्षक डॉ. शुभम कुमार, बारामती विभागाचे अपर पोलीस अधीक्षक गणेश बिरादार आणि दौंडचे उपविभागीय पोलीस अधिकारी बापूराव दडस यांच्या मार्गदर्शनाखाली स्थानिक गुन्हे शाखेचे पोलीस निरीक्षक प्रमोद क्षीरसागर, यवत पोलीस ठाण्याचे पोलीस निरीक्षक संतोष तासगावकर, सहायक पोलीस निरीक्षक नितीन अतकरे, पोलीस उपनिरीक्षक मारोती मेतलवाड, पोलीस उपनिरीक्षक अक्षय मोरे, पोलीस उपनिरीक्षक दशरथ नंदिवाले, पोलीस उपनिरीक्षक ज्ञानेश्वर राऊत, सहायक पोलीस उपनिरीक्षक बाळासाहेब थिकोळे, पोलीस हवालदार संदीप देवकर, सुहास देवकाते, पोलीस कर्मचारी मारुती बाराते, प्रतीक जगताप, धीरज जाधव, अमोल भुजबळ, सचिन गुंड, प्रतीक गरुड, विनीत कुर्‍हाडे, दिनेश लोणकर, सचिन घाडगे, आसिफ शेख, गुरुनाथ गायकवाड, सुभाष राऊत आणि विकास कापरे यांच्या पथकाने केली आहे.
