पुणे : गणेशोत्सव पर्यावरणपूरक पद्धतीने साजरा करण्याबाबत विद्यार्थ्यांमध्ये जागरूकता निर्माण करण्याच्या उद्देशाने भारत सरकारच्या पर्यावरण, वन आणि हवामान बदल मंत्रालयांतर्गत पुणे येथील इंडियन इन्स्टिट्यूट ऑफ ट्रॉपिकल मेटिऑरॉलॉजी (IITM) मधील EIACP केंद्राच्या वतीने पर्यावरणपूरक गणेशमूर्ती निर्मिती उपक्रमाचे आयोजन करण्यात आले.
शुक्रवार, दि. ११ सप्टेंबर २०२६ रोजी सकाळी १० ते दुपारी १ या वेळेत शाळेच्या ग्रंथालयात हा उपक्रम पार पडला. बी. टी. शाहानी नवीन हिंद हायस्कूल अँड ज्युनिअर कॉलेजमधील विद्यार्थ्यांनी या उपक्रमात उत्स्फूर्त सहभाग नोंदविला. यावेळी विद्यार्थ्यांना पर्यावरणपूरक साहित्याचा वापर करून गणेशमूर्ती तयार करण्याचे प्रात्यक्षिक व मार्गदर्शन देण्यात आले. तसेच गणेशमूर्ती विसर्जनामुळे जलस्रोतांचे होणारे प्रदूषण टाळण्यासाठी पर्यावरणपूरक पर्यायांचा अवलंब करण्याचे महत्त्व समजावून सांगण्यात आले.
विद्यार्थ्यांमध्ये पर्यावरण संवर्धनाची भावना रुजविणे आणि गणेशोत्सव अधिक जबाबदारीने साजरा करण्यास प्रोत्साहन देणे, हा या उपक्रमाचा प्रमुख उद्देश होता. मुख्याध्यापिका श्रीमती कविता देशपांडे आणि सहाय्यक शिक्षिका श्रीमती मीना गोफणे यांच्या मार्गदर्शनाखाली व देखरेखीखाली हा उपक्रम यशस्वीपणे पार पडला. विद्यार्थ्यांसाठी हा उपक्रम ज्ञानवर्धक, सर्जनशील आणि आनंददायी अनुभव ठरला.
