अब्बास शेख
दौंड : दौंड पोलीस स्टेशन व महात्मा बसवेश्वर ब्लड बँक, सोलापूर यांच्या संयुक्त विद्यमाने मंगळवारी (दि. १८ ऑगस्ट) दौंड पोलीस स्टेशन येथे भव्य रक्तदान शिबिराचे आयोजन करण्यात आले. सकाळी ११ ते सायंकाळी ४ वाजेपर्यंत झालेल्या या शिबिराला पोलीस अधिकारी, पोलीस अंमलदार तसेच पोलीस पाटील यांनी उत्स्फूर्त प्रतिसाद दिला.
या रक्तदान शिबिरात पोलीस अधिकारी, कर्मचारी आणि पोलीस पाटील यांनी स्वयंस्फूर्तीने रक्तदान करत सामाजिक बांधिलकी जपली. या उपक्रमातून जवळपास ४० बाटल्या रक्त संकलित करण्यात आले. रक्तदान हे श्रेष्ठदान असून, गरजू रुग्णांना वेळेवर रक्त उपलब्ध होण्यासाठी अशा सामाजिक उपक्रमांचे महत्त्व मोठे आहे.
पोलीस दलाच्या सामाजिक बांधिलकीच्या भावनेतून आयोजित करण्यात आलेल्या या शिबिराला अधिकारी व कर्मचाऱ्यांसह पोलीस पाटील यांनी उत्स्फूर्त सहभाग नोंदविला. या उपक्रमाच्या माध्यमातून “रक्तदान करा, जीवन वाचवा” हा सामाजिक संदेश देण्यात आला. दौंड पोलीस स्टेशनचे पोलीस निरीक्षक हेमंत शेडगे यांच्या मार्गदर्शनाखाली हा उपक्रम पार पडला.
