बारामती : बारामती येथील अतिरिक्त जिल्हा व सत्र न्यायाधीश, बारामती न्यायालयाच्या परिसरात दौंडचे पोलीस कर्मचारी सरकारी काम करत असताना त्यांना आरोपीने धक्काबुक्की करून जखमी करत पळून जाण्याचा प्रयत्न केल्याची घटना घडली आहे. याप्रकरणी बारामती शहर पोलिस ठाण्यात गुन्हा दाखल करण्यात आला आहे.
महेंद्र हरिभाऊ लोहार (वय ४१, पोलीस हवालदार, दौंड पोलीस ठाणे, पुणे ग्रामीण) यांनी याबाबत फिर्याद दिली आहे. त्यांच्या फिर्यादीवरून आरोपी परदेशी उर्फ ठेप्या सुदाम चव्हाण (वय १९, रा. बोरीबेल, ता. दौंड, जि. पुणे) याच्यावर गुन्हा दाखल करण्यात आला असून दि. १० ऑगस्ट २०२६ रोजी सायंकाळी सुमारे ५.३० वाजण्याच्या सुमारास बारामती येथील अतिरिक्त जिल्हा व सत्र न्यायाधीश, बारामती कोर्ट परिसरात फिर्यादी सरकारी काम करीत असताना सदर आरोपीने अडथळा आणून फिर्यादी पोलीस हवालदार लोहार यांना जोराचा धक्का दिल्याने ते जमिनीवर पडले. यामध्ये त्यांच्या उजव्या पायाच्या गुडघ्याला दुखापत झाली.
या घटनेनंतर आरोपी पोलिसांच्या कायदेशीर रखवालीतून पळून गेला. त्यानंतर फिर्यादी तसेच पोलीस हवालदार विनोद चव्हाण यांनी आरोपीचा पाठलाग करून त्याला पकडले. या प्रकरणी बारामती शहर पोलिस ठाण्यात भारतीय न्याय संहितेच्या कलमान्वये गुन्हा दाखल करण्यात आला असून, पुढील तपास बारामती पोलिस करीत आहेत.
