अब्बास शेख
दौंड : बेकायदेशीर गर्भलिंग निदान प्रकरणाचा तपास करणाऱ्या यवत पोलिसांच्या विशेष तपास पथकाने (SIT) मोठी कारवाई केली आहे. या प्रकरणातील मुख्य आरोपी अण्णासाहेब गिरी याची पत्नी राणी अण्णासाहेब गिरी हिचा गुन्ह्यात प्रत्यक्ष सहभाग असल्याचे तपासात निष्पन्न झाल्यानंतर तिला ८ सप्टेंबर रोजी अटक करण्यात आली. न्यायालयाने तिला ११ सप्टेंबर २०२६ पर्यंत पोलीस कोठडी सुनावली आहे.
यवत पोलीस ठाण्यात दाखल असलेल्या या गंभीर गुन्ह्याचा तपास पुणे ग्रामीणचे पोलीस अधीक्षक संदीपसिह गिल यांच्या आदेशानुसार विशेष तपास पथकाकडून सखोल व तांत्रिक पद्धतीने सुरू आहे. तपासादरम्यान मुख्य आरोपीच्या घरी बेकायदेशीर गर्भलिंग निदान करण्याच्या कृत्यात राणी गिरी हिचाही प्रत्यक्ष सहभाग असल्याचे समोर आले. तसेच या बेकायदेशीर व्यवहारातून मिळणारी रक्कम तिच्या वैयक्तिक बँक खात्यात घेतली जात असल्याचे, तसेच इतर आरोपींच्या खात्यांमधूनही रक्कम हस्तांतरित झाल्याचे तपासात निष्पन्न झाले आहे.
तीन आरोपींचे जामीन अर्ज फेटाळले
या प्रकरणात यापूर्वी अटक करण्यात आलेले डॉ. सुमंत तुकाराम शितोळे, बापूराव जांभळे आणि सचिन कदम यांनी बारामती येथील सत्र न्यायालयात जामिनासाठी अर्ज दाखल केला होता. सुनावणीदरम्यान तपासी अधिकाऱ्यांनी आरोपींविरुद्ध निष्पन्न झालेले सबळ व तांत्रिक पुरावे न्यायालयासमोर मांडले. हे पुरावे आणि प्रकरणाचे गांभीर्य विचारात घेऊन सत्र न्यायालयाने तिन्ही आरोपींचे जामीन अर्ज फेटाळले.
दरम्यान, या गुन्ह्यातील वॉन्टेड असलेला आरोपी डॉ. मंदार सुरेश माळी याने अटकेपासून बचाव करण्यासाठी दाखल केलेला अटकपूर्व जामीन अर्जही बारामती सत्र न्यायालयाने यापूर्वीच फेटाळला आहे. बेकायदेशीर गर्भलिंग निदान प्रकरणाचा पुढील सखोल व विधिग्राह्य तपास यवत चे पोलीस निरीक्षक संतोष तासगावकर व SIT पथकाकडून सुरू आहे.
