सुपे : बारामती तालुक्यातील सुपे जवळ असणाऱ्या बाबुर्डी येथील शेरेवाडी परिसरात दोन ज्येष्ठ महिलांची झोपेतच गळा चिरून हत्या करण्यात आल्याची धक्कादायक घटना आज मंगळवारी दि. २९ सप्टेंबर रोजी सकाळी उघडकीस आली असून या घटनेमुळे संपूर्ण परिसरात खळबळ उडाली आहे. या घटनेतील मृत महिलांची नावे इंदुबाई मारुती लडकत (वय ७५) आणि कृष्णाबाई कुंडलिक लडकत (वय ६५) अशी आहेत. इंदुबाई लडकत या बाबुर्डीच्या माजी सरपंच असल्याची माहिती समोर आली आहे.
मिळालेल्या माहितीनुसार, दोन्ही महिला सोमवारी रात्री इंदुबाई लडकत यांच्या घराच्या ओसरीबाहेर झोपल्या होत्या. मंगळवारी सकाळी शेजाऱ्यांच्या निदर्शनास दोघींचे मृतदेह आल्याने हा प्रकार उघडकीस आला. दोघींचीही झोपेतच गळा चिरून हत्या करण्यात आल्याची प्राथमिक माहिती मिळत आहे. दरम्यान, दोन्ही महिलांची हत्या नेमक्या कोणत्या कारणातून करण्यात आली, याबाबत अद्याप स्पष्टता झालेली नाही.
घटनेची माहिती मिळताच बारामती आणि सुपे पोलीस ठाण्याचे वरिष्ठ पोलीस अधिकारी घटनास्थळी दाखल झाले असून, हत्या करणाऱ्या अज्ञात व्यक्तीचा शोध आणि हत्येमागील कारणाचा तपास सुरू करण्यात आला आहे. या दुहेरी हत्याकांडामुळे बाबुर्डी परिसरात एकच खळबळ माजली असून या प्रकरणातील पुढील तपासात आरोपी कोण आणि हत्येमागील नेमके कारण काय, हे स्पष्ट होणार आहे.
