पारगाव, दौंड : यवत पोलीस ठाण्याच्या हद्दीत अल्पवयीन मुलींचा पाठलाग करून त्यांच्याशी गैरवर्तन व विनयभंग केल्याप्रकरणी दोन आरोपींना यवत पोलिसांनी अटक केली आहे. या प्रकरणामुळे परिसरात खळबळ उडाली आहे. याबाबत यवत पोलीस ठाण्यात विविध कलमांखाली गुन्हा दाखल करण्यात आला आहे.
पोलिसांनी दिलेल्या माहितीनुसार, २० जुलै २०२६ तसेच २७ जुलै २०२६ रोजी सायंकाळी सुमारे ५ वाजण्याच्या सुमारास मौजे पारगाव (ता. दौंड) येथील पारगाव चौक परिसरात ही घटना घडली. फिर्यादी असलेली १२ वर्षे १० महिन्यांची अल्पवयीन मुलगी व तिची बहीण शाळेतून घरी जात असताना आरोपींनी त्यांच्या ताब्यातील इको (एमएच ४२ बीएस ८५३५) या वाहनातून त्यांचा पाठलाग केला.
त्यानंतर वाहन आडवे लावून आरोपी प्रविण गणपत थोरात (रा. खुटबाव, ता. दौंड) याने गाडीतून उतरून फिर्यादीला “तू मला खूप आवडतेस” असे म्हणत तिचा हात पकडून जवळ ओढले तर दुसरा आरोपी दिनेश दत्तात्रय पासलकर (रा. खुटबाव, ता. दौंड) याने फिर्यादीच्या बहिणीचा हात धरून तिच्याशीही गैरवर्तन केल्याचे तक्रारीत नमूद करण्यात आले आहे.
या प्रकरणी तक्रारीवरून २८ जुलै २०२६ रोजी रात्री गुन्हा दाखल करण्यात आला. त्यानंतर यवत पोलिसांनी तातडीने तपास करत दोन्ही आरोपींना २९ जुलै २०२६ रोजी सकाळी अटक केली आहे. या प्रकरणाचा पुढील तपास पोलीस उपनिरीक्षक किशोर वागज करीत असून, गुन्ह्याची नोंद सहाय्यक पोलीस निरीक्षक सुवर्णा गोसावी यांच्या मार्गदर्शनाखाली करण्यात आली आहे.
