दौंड : दौंड तालुक्यातील चौफुला (बोरिपार्धी) येथे विनापरवाना गावठी पिस्टलचा धाक दाखवून दहशत निर्माण करणाऱ्या दोघांना केडगाव (यवत) पोलिसांनी अटक केली आहे.
मिळालेल्या माहितीनुसार, दि. १२ जून रोजी सायंकाळी ५ च्या सुमारास चौफुला, बोरीपार्धी येथे असणाऱ्या रेणुका कलाकेंद्रामध्ये आरोपी मयूर दत्तू पाटील, (वय २६) आणि पवन कल्लू बर्मी, (वय २१, दोन्ही रा. पिंपळवाडी रोड, उरुळी कांचन. ता. हवेली. जि. पुणे) यांनी बेकायदेशीररित्या गावठी पिस्टल व एक जिवंत काडतूस जवळ बाळगून सोमनाथ छगन माने (वय ३०, रा. वेताळबाबा वसाहत, हडपसर) यांना सदर शस्त्राचा धाक दाखवून शिवीगाळ व दमदाटी करत चौफुला परिसरात दहशत निर्माण केली होती.
घटना घडल्यानंतर आरोपिंना पकडण्यासाठी यवतचे पोलिस निरीक्षक संतोष तासगावकर यांच्या मार्गदर्शनाखाली पोलीस उपनिरीक्षक किशोर वागज यांनी पोलीस पथक तयार करून विविध ठिकाणी शोध मोहीम राबविली. तपासा दरम्यान तांत्रिक विश्लेषणाच्या मदतीने पोलीस पथकाने प्रभावी कारवाई करत पोलीस उपनिरीक्षक किशोर वागज व पोलिस पथकाने दोन्ही आरोपींना अवघ्या दोन तासात अटक केली. यावेळी त्यांच्याकडून गुन्ह्यात वापरलेले अवैध गावठी पिस्टल व एक जिवंत काडतूस हस्तगत करण्यात आले आहे.
सदरची कारवाई पुणे ग्रामिण पोलिस अधीक्षक संदीपसिंह गिल, गणेश बिरादार (अपर पोलीस अधिक्षक बारामती) बापुराव दडस (उपविभागीय पोलीस अधिकारी दौंड) यांच्या मार्गदर्शनाखाली यवत पोलीस स्टेशनचे पोलीस निरीक्षक संतोष तासगावकर, पोलीस उपनिरीक्षक किशोर वागज, पोलीस उपनिरीक्षक बाळकृष्ण गाडेकर, पोलीस हवालदार परशुराम म्हस्के, मेघराज जगताप, संदिप करे, किशोर मोहिते,पोकॉ प्रतिक धिवार, दादा जाधव यांच्या पथकाने केली आहे.
