दौंड : देऊळगाव राजे ते वडगाव दरेकर मार्गावर शासकीय रॉयल्टी न भरता मुरुमाचे उत्खनन करून त्याची वाहतूक केल्याप्रकरणी तसेच सरकारी कामात अडथळा निर्माण करून शिवीगाळ व दमदाटी केल्याच्या आरोपावरून दोघांविरोधात दौंड पोलीस ठाण्यात गुन्हा दाखल करण्यात आला आहे. याप्रकरणी शुभांगी बबन गुंड (वय ३२, व्यवसाय नोकरी, ग्राम महसूल अधिकारी) यांनी फिर्याद दिली आहे. त्यानुसार अंबादास शेळके (पूर्ण नाव माहीत नाही) आणि नरेंद्र दादा कोरे (दोघे रा. देऊळगाव राजे, ता. दौंड, जि. पुणे) यांच्याविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, १७ सप्टेंबर २०२६ रोजी दुपारी सुमारे १२.२० वाजता देऊळगाव राजे गावच्या हद्दीत देऊळगाव राजे ते वडगाव दरेकर रोडवर हायवा ट्रक मधून मुरुमाची वाहतूक केली जात असल्याचे आढळून आले. आरोपींनी शासकीय रॉयल्टी न भरता गौणखनिज असलेल्या मुरुमाचे उत्खनन करून पर्यावरणाचा ऱ्हास केल्याचा तसेच मुरुमाची चोरी करून वाहतूक केली आहे. या कारवाईत ५ ब्रास मुरुम, अंदाजे किंमत ३५ हजार रुपये, तसेच भारतबेन्झ कंपनीचा दहा टायर हायवा ट्रक, अंदाजे किंमत १० लाख रुपये, असा एकूण १० लाख ३५ हजार रुपयांचा मुद्देमाल पंचनामा करून ताब्यात घेण्यात आला आहे.
दरम्यान, फिर्यादी शासकीय काम करीत असताना आरोपींनी शिवीगाळ व दमदाटी केली. हाताच्या बाह्या वर करून अंगावर धावत येत शासकीय कामात अडथळा निर्माण केल्याचेही फिर्यादीत म्हटले आहे. या प्रकरणी दौंड पोलीस ठाण्यात भारतीय न्याय संहितेच्या कलम ३०३(२), १३२, ३५१(१), ३५२, ३(५) तसेच गौणखनिज उत्खनन कायद्यान्वये कलम ४ व २१ प्रमाणे गुन्हा दाखल करण्यात आला आहे. पुढील तपास पोलीस हवालदार म्हेत्रे करीत आहेत.
