अब्बास शेख
दौंड : दौंड कृषी उत्पन्न बाजार समिती ही २०१६ पासून २०२३ पर्यंत कधी वार्षिक एक कोटी नफ्याचा आकडा पार करु शकली नव्हती मात्र या कृषी उत्पन्न बाजार समितीचे कामकाज शेतकऱ्यांनी विश्वासाने आमच्या हातात दिल्यानंतर शेतकरी आणि व्यापाऱ्यांना विश्वासात घेऊन कामकाजात जे बदल केले गेले त्याचा मोठा फायदा कृषी उत्पन्न बाजार समितीला होऊन एका वर्षात बाजार समितीला ६ कोटी ९२ लाख इतका नफा मिळाला अशी माहिती आमदार राहुल कुल यांनी दौंड तालुका कृषी उत्पन्न बाजार समितीच्या २३ व्या वार्षिक सर्वसाधारण सभा आणि आयोजित करण्यात आलेल्या शेतकरी मेळाव्यात दिली.
आमदार कुल यांनी यावेळी मागील दहा वर्षांचा मागोवा घेताना, दौंड तालुका कृषी उत्पन्न बाजार समिती ही २०१६-१७ साली १५ लाख नफ्यात होती ती २०१७-१८ ला २० लाख, १८-१९ ला ३२ लाख, १९-२० ला ३५ लाख, २०-२१ ला ४५ लाख, २१-२२ ला ६१ लाख, २२-२३ ला ७५ लाख, २३-२४ ला ७९ लाख आणि त्यानंतरच्या काळामध्ये आपण कामकाजामध्ये बदल केले आणि त्यामुळे २४-२५ ला ४ कोटी १६ लाख आणि २५-२६ ला ६ कोटी ९२ लाख जो नफा झाला हा परिणाम चांगल्या कामाचा आहे असे मत त्यांनी व्यक्त केले.
शनिवार दि.२६ सप्टेंबर रोजी सकाळी ११:३० वाजता दौंड कृषी उत्पन्न बाजार समितीची २३ वी वार्षिक सर्वसाधारण सभा आणि भव्य शेतकरी मेळाव्याचे आयोजन करण्यात आले होते. कार्यक्रमाच्या सुरुवातीला केडगाव उपबाजार समिती आवारात कांदा आणि डाळिंब शेडचे भूमिपूजन करण्यात आले. यानंतर विविध वक्त्यांनी आपले मनोगत व्यक्त केल्यानंतर तालुक्यातील उत्कृष्ट शेतकऱ्यांना लोकनेते ‘स्व.सुभाषआण्णा कुल कृषिभूषण पुरस्काराने’ सन्मानित करण्यात आले. या सोहळ्याला दौंड तालुक्याचे आमदार ॲड.राहुल कुल हे प्रमुख पाहुणे म्हणून उपस्थित होते.
बाजार समितीची मालकी ६० एकरांपर्यंत विस्तारली
कृषी उत्पन्न बाजार समितीचे सभापती गणेश जगदाळे यांनी आ.कुल यांच्या मार्गदर्शनाखाली शेतकरी हित आणि बाजार समितीच्या सर्वांगीण विकासासाठी राबविण्यात येत असलेल्या विविध उपक्रमांची माहिती दिली. आमदार राहुल कुल यांच्या बहुमोल सहकार्याने संस्थेला पाटस येथे उपबाजार आवार उभारणीसाठी १० एकर जागा आणि केडगाव येथे बाजार आवाराच्या विस्तारीकरणासाठी २० एकर जागा विनामूल्य मिळवून देण्यात यश आले असून यामुळे बाजार समितीचे मालकीचे क्षेत्र वाढून तब्बल ६० एकरांपर्यंत उपलब्ध झाले असल्याचे सांगितले.
गुळ खरेदी-विक्रीवर नियंत्रण : आमदार कुल यांनी बोलताना, संपूर्ण तालुक्यातील गुळाच्या खरेदी-विक्रीवर नियंत्रण आणल्याने शेतकऱ्यांच्या होणाऱ्या फसवणुकीस आता प्रभावीपणे आळा बसला असून समितीच्या उत्पन्नातही चांगली वाढ झाली असल्याचे सांगितले. यावेळी आमदार कुल यांनी कृषी उत्पन्न बाजार समितीचा चढता आलेख, राज्य आणि केंद्राकडून होणारी मदत, तालुक्यातील पाण्याचे नियोजन, रस्त्यांची कामे, आरोग्य सेवा, दुष्काळ सदृश परिस्थिती आणि दौंड ची सद्य परिस्थिती यावर प्रकाश टाकला. आजच्या झालेल्या या कार्यक्रमाला मोठ्या प्रमाणावर शेतकरी बांधवांनी हजेरी लावली होती. दादांनी आरोग्य सेवेच्या माध्यमातून सहकार्य केल्याने त्यांचा चौफुला येथील ग्रामस्थांकडून विशेष सत्कारही करण्यात आला.
कारखान्याची निवडणूक लावण्याचा प्रयत्न का होतोय हे समजत नाही – आ.कुल
विविध विषयांवर बोलल्यानंतर आमदार कुल यांनी कारखान्याच्या निवडणुकीबाबत बोलताना, जिल्हा बँक आणि राज्य बँक यांनी कारखाना भाडे तत्वावर चालवायला दिला असल्याने जोपर्यंत कर्ज फिटत नाही तोपर्यंत कारखान्यात चेअरमन आणि संचालकांना शून्य अधिकार आहे तरीही काही जणांकडून कारखान्याची निवडणूक लावण्याचा प्रयत्न का होतोय हे समाजात नाही असा सवाल उपस्थित केला.
मान्यवरांच्या उपस्थितीत पुरस्कार वितरण सोहळा संपन्न
याप्रसंगी ‘स्वर्गीय आमदार सुभाष आण्णा कुल कृषी भूषण पुरस्कार’ प्राप्त शेतकरी व व्यापाऱ्यांचा सन्मान आमदार राहुल कुल यांच्या हस्ते करण्यात आला. यावेळी आगामी काळात सर्व शेतकऱ्यांच्या शेतमालाला उत्तम बाजारभाव आणि सर्वोत्तम सोयी-सुविधा देण्याचा निर्धार व्यक्त करण्यात आला. या भव्य सोहळ्यास सभापती गणेश जगदाळे, उपसभापती शरद कोळपे, पंचायत समिती सभापती सुखदेव चोरमले, मा. पंचायत समिती सभापती आप्पासाहेब पवार, महेश भागवत, तानाजी दिवेकर, माऊली ताकवणे, निळकंठ शितोळे, हरिभाऊ ठोंबरे, धनाजी शेळके, आप्पासाहेब हंडाळ, एम.डी फरगडे, सचिव मोहन काटे यांच्यासह सर्व संचालक, सभासद, हमाल, मापाडी, पुरस्कार प्राप्त शेतकरी आणि कर्मचारी मोठ्या संख्येने उपस्थित होते. कार्यक्रमाचे सूत्रसंचालन ॲड.बापूराव भागवत यांनी केले.
