केडगाव, दौंड : केडगाव हद्दीत भरधाव व निष्काळजीपणे चालविलेल्या ॲम्ब्युलन्सने रस्त्याच्या कडेला उभ्या असलेल्या कंटेनरला पाठीमागून जोरदार धडक दिल्याने झालेल्या अपघातात दोन जणांचा मृत्यू झाला. ही घटना रविवार (दि. १६ ऑगस्ट) पहाटे चारच्या सुमारास व्यंकटेश पेट्रोलियम पंपासमोर घडली. याबाबत यवत पोलीस ठाण्यात ॲम्ब्युलन्स चालक ओंकार अंतराम कणसे (रा. रेणापूर, जि. लातूर) याच्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, आरोपी ॲम्ब्युलन्स चालक वाहन भरधाव वेगाने व निष्काळजीपणे चालवत होता. वाहतुकीच्या नियमांकडे दुर्लक्ष करून वाहनावर योग्य नियंत्रण न ठेवल्याने ॲम्ब्युलन्सने रस्त्याच्या कडेला उभ्या असलेल्या एमएच २३ एयू १८१७ क्रमांकाच्या कंटेनरला पाठीमागून जोरदार धडक दिली. या अपघातात शेटीबा वडजी मुधोळकर (वय ७०) आणि देवानंद सुरेश मुधोळकर (वय १७) यांचा मृत्यू झाला. तसेच फिर्यादी सचिन सुरेश मुधोळकर यांना किरकोळ दुखापत झाली असून वाहनांचेही नुकसान झाले आहे.
याप्रकरणी सचिन सुरेश मुधोळकर (वय २५, रा. १२ नंबर पाटी, मांजरा, ता. रेणापूर, जि. लातूर) यांनी यवत पोलीस ठाण्यात फिर्याद दिली. त्यावरून आरोपीविरुद्ध भारतीय न्याय संहितेतील कलम ३२४(४), २८१, १०६(१), १२५(अ), १२५(ब) तसेच मोटार वाहन कायदा कलम १८४ अन्वये गुन्हा दाखल करण्यात आला आहे.
गुन्हा दाखल झाल्यानंतर यवत पोलिसांकडून अपघाताचा पुढील तपास सुरू असून पोलीस उपनिरीक्षक किशोर वागज तपास करीत आहेत. एकाच अपघातात आजोबा आणि १७ वर्षीय नातवाचा मृत्यू झाल्याने मुधोळकर कुटुंबावर शोककळा पसरली आहे.
