केडगाव, दौंड : दौंड तालुक्यातील केडगाव स्टेशन येथे असलेल्या मिळकती ह्या नियमाकुल असल्याचे भासवत शासनाची फसवणूक करुन एका मिळकतीचा आदेश बनावट पद्धतीने दुसऱ्या मिळकतींना जोडून त्याचे बेकायदेशीरपणे खरेदीखत करुन ती मिळकत अधिकृत असल्याचे दाखविण्याचा प्रयत्न करण्यात येऊन शासनाची आणि महसूल विभागाची मोठी फसवणूक करण्यात आल्याचा प्रकार केडगाव स्टेशन येथे घडला आहे.
याबाबत केडगाव सबरजिस्ट्रार येथे पुराव्यानिशी तक्रार दाखल करण्यात आल्यानंतर मोठी खळबळ उडाली असून या तक्रारी अर्जाच्या प्रती मा.महसूल मंत्री श्री. चंद्रशेखर बावनकुळे, नोंदणी महानिरीक्षक व मुद्रांक नियंत्रक,महाराष्ट्र राज्य, पुणे कार्यालय. मा.सह जिल्हा निबंधक वर्ग १ व मुद्रांक जिल्हाधिकारी पुणे ग्रामिण, जिल्हाधिकारी पुणे, दौंडचे आमदार राहुल कुल, उपविभागीय अधिकारी, दौंड. तसेच तहसीलदार दौंड यांना पाठविण्यात येणार आहेत.
तक्रारीनुसार, संबंधित व्यक्तींनी शासनाची फसवणूक करत चुकीच्या पद्धतीने ज्या मिळकतीचा आदेशच नाही तो अन्य मिळकतीचा नियमाकुल आदेश जोडून अन्य मिळकतीचे एक ते दिड, दोन गुंठ्याचे खरेदी खते केली आहेत. त्यामुळे चुकीच्या पद्धतीने करण्यात आलेली ही खरेदीखते रद्द करुन शासनाची फसवणूक करणाऱ्या संबंधित व्यक्तींवर फौजदारी कारवाई करण्याची मागणी करण्यात आली आहे.
मिळत असलेल्या अधिक माहितीनुसार, २०२५ साली करण्यात आलेल्या या विविध खरेदीदस्तांना, नियमाकुलचा आदेश जोडण्यात आला जो फक्त एका मिळकतीसाठी तुकडेबंदी कायदा आड येत असल्यामुळे दौंड तहसील कार्यालयाकडून २०२४ साली देण्यात आला होता. मात्र एका मिळकतीसाठी देण्यात आलेला तोच तोच आदेश पुढे बनावट पद्धतीने अन्य मिळकतींना जोडून ज्यांच्या चतुरसिमा वेगवेगळ्या आणि मिळकती वेगवेगळ्या ठिकाणी असताना बनावट पद्धतीने त्याचा वापर करुन खरेदीदस्त अस्तित्वात आणण्यात आलेली आहेत.
या सर्व प्रकरणात मोठी आर्थिक देवाण घेवाण आणि महसूल कर्मचाऱ्याचा सहभाग असल्याची चर्चा केडगावमध्ये सुरु असून पुढील अंकात त्यांचाही भांडाफोड होणार आहे. क्रमशः..
