केडगाव : दौंड तालुक्यातील केडगाव आणि परिसरात गर्भलिंग निदान करणाऱ्या एका डॉक्टरचा सोशल मीडियावर व्हिडीओ प्रसारित होऊन भांडाफोड झाल्यानंतरही त्यावर कारवाई होत नसल्याने आश्चर्य व्यक्त केले जात होते मात्र याची सहकारनामा ने बातमी केल्यानंतर मात्र आरोग्य यंत्रनेला जाग येऊन अखेर उप जिल्हा रुग्णालयाचे वैद्यकीय अधिक्षक यांनी तक्रार दिल्यानंतर यातील गर्भलिंग निदान करणाऱ्या आरोपी आणि स्वतःला डॉक्टर म्हणवणाऱ्यावर गुन्हा दाखल करण्यात आला आहे.
यवत पोलिसांकडून मिळालेल्या माहितीनुसार, आरोपीवर गर्भलिंग निदान प्रतिबंधक कायदा कलम 3, 3 (अ), 6 (ब) (क), 18,23,25 नुसार गुन्हा दाखल करण्यात आला असून याची फिर्याद डॉ. सचिन विठ्ठल गुजर, (वय 40 वर्ष, वैद्यकीय अधीक्षक उपजिल्हा रुग्णालय दौंड, रा. मांजरी पुणे) यांनी दिली आहे.
डॉ. गुजर यांनी दिलेल्या फिर्यादीवरून आरोपी अण्णासाहेब गिरी (रा. केडगाव, ता. दौंड जि. पुणे) याच्यावर गुन्हा दाखल करण्यात आला आहे. त्यांना दौंड तालुक्यातील केडगाव परिसरामध्ये अवैध रित्या गर्भलिंग निदानाचा प्रकार घडत असल्याचा व्हिडिओ व्हाट्सअपवर प्राप्त झाला. तो प्रथमदर्शनी सदरचा प्रकार बेकायदेशीर गर्भलिंग निदानाचा असून व्यापक जनहिताचा विचार करता आरोपीविरुद्ध फिर्यादी यांनी तक्रार दिली. पुढील तपास पोलीस उपनिरीक्षक मारोती मेतलवाड हे करीत आहेत.
ते ब्लॅकमेलर टोळीवर गुन्हा दाखल होणार का ..?? संबंधित डॉक्टरला त्याच्या कृत्यावरून कोणीतरी ब्लॅकमेल करत असल्याचीही चर्चा या परिसरात रंगत असून हे घडत असलेले कांड जनतेसमोर आणायचे सोडून त्याला ब्लॅकमेल केले जात असेल तर ब्लॅकमेलर टोळीवरही गुन्हा दाखल होणार का असा सवाल सर्व सामान्य जनतेमधून उपस्थित होत आहे.
