पुणे : तक्रारदार व त्यांच्या आईवडिलांविरुद्ध दाखल असलेल्या गुन्ह्यात अटक न करता नोटीस देऊन सोडण्यासाठी तसेच गुन्ह्यात मदत करण्यासाठी १५ हजार रुपयांच्या लाचेची मागणी करणाऱ्या पोलिस हवालदाराला लाचलुचपत प्रतिबंधक विभागाने रंगेहाथ पकडले. या प्रकरणातील आरोपी शिवाजी ज्योतिराम बनकर (वय ४४ पोलीस हवालदार, नेमणूक शिरूर पोलीस ठाणे, पुणे ग्रामीण) याच्याविरुद्ध कारवाई करण्यात आली आहे.
तक्रारदाराच्या वडिलांविरुद्ध शिरूर पोलीस ठाण्यात दि. १९ ऑगस्ट २०२६ रोजी गुन्हा दाखल झाला होता. या गुन्ह्यात अटक न करता नोटीस देऊन सोडण्यासाठी आरोपी बनकर याने तक्रारदाराकडे १५ हजार रुपये लाचेची मागणी होती त्यामुळे तक्रारदाराने यापूर्वी ५ हजार रुपये दिले होते, तर उर्वरित १० हजार रुपयांसाठी आरोपीने तगादा लावला होता.
यानंतर तक्रारदाराने दि. २९ सप्टेंबर २०२६ रोजी लाचलुचपत प्रतिबंधक विभाग, पुणे येथे तक्रार दिली. पडताळणीदरम्यान आरोपीने लाचेची मागणी केल्याचे निष्पन्न झाले. त्यानंतर दि. ३० सप्टेंबर २०२६ रोजी जुने शिरूर पोलीस स्टेशन परिसरात सापळा रचण्यात आला. सापळा कारवाईदरम्यान आरोपी पोलीस हवालदार शिवाजी बनकर याने तक्रारदाराकडून ११ हजार रुपये लाचेची रक्कम स्वीकारली असता त्याला रंगेहाथ पकडण्यात आले. या प्रकरणी भ्रष्टाचार प्रतिबंधक कायदा अन्वये गुन्हा दाखल करण्याची प्रक्रिया शिरुर पोलीस ठाणे येथे सुरू आहे.
