पुणे : पुणे शहर पोलीस दलातील लोणी काळभोर पोलीस ठाण्यातील एका सहाय्यक पोलीस निरीक्षकाला (A.P.I.) लाचलुचपत प्रतिबंधक विभाग (ACB) ने पन्नास हजारांची लाच घेताना पकडले आहे. सदर अधिकाऱ्याने दाखल गुन्ह्यात न्यायालयात दोषारोप पत्र लवकर दाखल करण्यासाठी आणि उच्च न्यायालयात सुरू असलेल्या अटकपूर्व जामीन अर्जात मदत करण्यासाठी तब्बल २ लाख ५० हजार रुपयांच्या लाचेची मागणी केली होती. कृष्णाराव जनार्दन बाबर (वय ४५, नेमणूक- लोणी काळभोर पोलीस स्टेशन) असे कारवाई करण्यात आलेल्या साहाय्यक पोलीस निरीक्षकाचे नाव असून त्यावर लाचलुचपत प्रतिबंधक विभागाने सापळा रचून कारवाई केली आहे.
काय आहे प्रकरण?
लाचलुचपत प्रतिबंधक विभागाकडून मिळालेल्या माहितीनुसार, तक्रारदार (वय ५७ वर्षे) व त्यांच्या मुलाविरुद्ध लोणी काळभोर पोलीस ठाण्यात BNS कलम ३१८(3), ३१८(5), ३(5) नुसार गुन्हा दाखल आहे. या गुन्ह्याचा तपास लोकसेवक ए.पी.आय. कृष्णा बाबर यांच्याकडे होता. तक्रारदार व त्यांच्या मुलाविरुद्ध असलेला गुन्ह्याचे दोषारोप पत्र लवकरात लवकर न्यायालयात दाखल करण्यासाठी ५०,००० रुपये आणि तक्रारदार यांचा मुलगा प्रतीक याच्या उच्च न्यायालयात सुरू असलेल्या अटकपूर्व जामीन अर्जात मदत करण्याकरिता २,००,०० रुपये, अशी एकूण २ लाख ५० हजार रुपयांच्या लाचेची मागणी करण्यात आली होती.
पडताळणी आणि सापळा कारवाई :
तक्रारदाराने दिलेल्या तक्रारीवरून दिनांक ८ सप्टेंबर २०२६ रोजी लाच मागणीची पडताळणी करण्यात आली. या पडताळणीदरम्यान ए.पी.आय. कृष्णा बाबर यांनी दोषारोप पत्र न्यायालयात लवकरात लवकर दाखल करण्यासाठी ५०,००० रुपये लाच मागणी करून ती स्वीकारण्यास सहमती दर्शवल्याचे निष्पन्न झाले. त्यानंतर दिनांक ८ सप्टेंबर २०२६ रोजी सापळा कारवाई करण्यात आली. मांजरी येथील शीतलादेवी मंदिरासमोर, श्रीकांत ट्रेडिंग दुकानासमोर आरोपी ए.पी.आय. कृष्णा बाबर यांनी तक्रारदाराकडून पंचांसमक्ष ५०,००० रुपये लाचेची रक्कम स्वतःच्या सियाज कारमध्ये स्वीकारली. यानंतर त्यांना रात्री ११:०२ वाजता ताब्यात घेण्यात आले.
सदरची कारवाई लाचलुचपत प्रतिबंधक विभाग, पुणे विभागाचे पोलीस निरीक्षक सुहास हट्टेकर व त्यांच्या पथकातील पो.शि. भूषण ठाकूर, म.पो.शि. वैशाली माकर, चा.पो.हवा. दीपक काकडे यांनी पार पाडली आहे. या प्रकरणाचा पुढील तपास पोलीस उपअधीक्षक सतीश वाळके हे करीत आहेत.
