बारामती : बारामती शहर व परिसरात बेकायदेशीर अग्निशस्त्रे व घातक हत्यारे बाळगणाऱ्यांविरुद्ध बारामती शहर पोलिसांनी कारवाईची मोहीम सुरू ठेवली आहे. त्याच अंतर्गत मिळालेल्या गोपनीय माहितीच्या आधारे पोलिसांनी सापळा रचून प्रदीप सुरेश नकाते (वय 27, रा. महात्मा फुलेनगर, आमराई, बारामती) याला देशी बनावटीचे गावठी पिस्तूल व दोन जिवंत काडतुसांसह ताब्यात घेतले. त्याच्याकडून सुमारे 25 हजार 400 रुपयांचा मुद्देमाल जप्त करण्यात आला असून, याप्रकरणी बारामती शहर पोलीस ठाण्यात गु.र.नं. 322/2026 अन्वये शस्त्र अधिनियम कलम 3 व 25 नुसार गुन्हा दाखल करण्यात आला आहे.
दिनांक 9 ऑगस्ट रोजी पोलीस शिपाई अक्षय सिताफ यांना गोपनीय बातमीदारामार्फत माहिती मिळाली की, प्रदीप नकाते कमरेला पिस्तूल खोचून काही साथीदारांसह फिरत असून, त्यांच्याकडे कोयत्यासारखी घातक हत्यारे आहेत. माहितीची गांभीर्याने दखल घेत सहाय्यक पोलीस निरीक्षक शशिकांत इंगवले यांनी प्रभारी पोलीस निरीक्षक श्रीशैल चिवडशेट्टी यांना माहिती दिली. वरिष्ठ अधिकाऱ्यांच्या मार्गदर्शनाखाली पोलिसांनी संशयितांच्या हालचालींवर लक्ष ठेवून सापळा रचला आणि प्रदीप नकाते याला ताब्यात घेतले. अंगझडतीमध्ये काळसर रंगाचे गावठी पिस्तूल व दोन जिवंत काडतुसे आढळून आली.
पोलिसांच्या कारवाईची चाहूल लागताच नकाते याच्यासोबत असलेले अजय नंदकुमार सकट, रोहीत अशोक सोनवणे व गणेश पाठक (सर्व रा. आमराई, बारामती) हे तीन संशयित पसार झाले. त्यांचा शोध घेण्यासाठी पोलिसांची पथके सक्रिय करण्यात आली आहेत. या तिघांचा नेमका सहभाग, त्यांच्याकडे असलेली हत्यारे, आरोपी एकत्रित फिरण्यामागील उद्देश तसेच कोणत्याही गंभीर गुन्ह्याचे नियोजन होते का, याचा तपास सुरू आहे. दरम्यान, प्रदीप नकाते याच्याविरुद्ध यापूर्वीही शस्त्र अधिनियमांतर्गत गुन्हा दाखल असून, 28 नोव्हेंबर 2025 रोजी त्याच्याकडून गावठी पिस्तूल व चार जिवंत काडतुसे जप्त करण्यात आली होती. त्यामुळे यावेळी शस्त्राचा पुरवठादार आणि संभाव्य शस्त्रसाखळीचा शोध घेण्यावर पोलिसांचा भर आहे.
विशेष म्हणजे, पोलीस शिपाई अक्षय सिताफ यांच्या गोपनीय माहिती संकलनाच्या कामामुळे मागील तीन वर्षांत बारामती शहर पोलीस ठाण्याच्या हद्दीत एकूण सहा अग्निशस्त्रे हस्तगत करण्यात आली आहेत. त्यामुळे बारामती शहर पोलिसांचे स्थानिक इंटेलिजन्स नेटवर्क पुन्हा एकदा अधोरेखित झाले आहे. या प्रकरणाचा पुढील तपास पोलीस हवालदार ज्ञानदेव विष्णू क्षीरसागर करीत आहेत. आरोपीला पिस्तूल कोठून व कोणाकडून मिळाले, त्यामागे कोणती शस्त्रपुरवठा साखळी आहे आणि या शस्त्रांचा कोणत्याही गंभीर गुन्ह्यासाठी वापर करण्याचे नियोजन होते का, याचा सखोल तपास करण्यात येत आहे. सदर कारवाई पोलीस अधीक्षक संदीप सिंह गिल्ल, अपर पोलीस अधीक्षक गणेश बिरादार, उपविभागीय पोलीस अधिकारी चैतन्य कदम व प्रभारी पोलीस निरीक्षक श्रीशैल चिवडशेट्टी यांच्या मार्गदर्शनाखाली करण्यात आली.
