शिक्रापूर : महाराष्ट्र आणि मध्य प्रदेशातील विविध ठिकाणी घरफोडी चोरी करणाऱ्या सराईत आरोपीला पुणे ग्रामीण पोलिसांच्या स्थानिक गुन्हे शाखा आणि शिक्रापूर पोलिसांनी संयुक्त कारवाई करत अटक केली. आरोपीकडून सुमारे 16 तोळे वजनाचे सोन्याचे दागिने, मोटारसायकल असा एकूण 24 लाख 30 हजार रुपयांचा मुद्देमाल हस्तगत करण्यात आला आहे.
शिक्रापूर व शिरूर परिसरातील घरफोडी चोरीच्या घटनांच्या पार्श्वभूमीवर पुणे ग्रामीणचे पोलीस अधीक्षक संदीपसिंग गिल यांनी स्थानिक गुन्हे शाखा व उपविभागातील तपास पथकांची बैठक घेऊन मालमत्तेचे गुन्हे उघडकीस आणण्याच्या सूचना दिल्या होत्या. त्यानुसार पोलिसांनी घटनास्थळे, चोरीची वेळ आणि आरोपींची कार्यपद्धती यांचा अभ्यास सुरू केला. तांत्रिक विश्लेषणासह गोपनीय खबऱ्यांकडून माहिती घेण्यात आली.
तपासादरम्यान आरोपी दिपक भिमराव दांडगे (वय 25, रा. घुग्री, ता. भैसदेही, जि. बैतूल, मध्य प्रदेश; सध्या रा. कविठा, ता. अचलपूर, जि. अमरावती) याच्याबाबत पोलिसांना गोपनीय माहिती मिळाली. त्यानंतर पोलिसांनी कविठा परिसरात जाऊन त्याला चौकशीसाठी ताब्यात घेतले. चौकशीत त्याने शिक्रापूर व शिरूर परिसरात घरफोडी चोरी केल्याची कबुली दिली.
आरोपीच्या चौकशीत शिक्रापूर पोलीस ठाण्यातील दोन आणि शिरूर पोलीस ठाण्यातील एका अशा एकूण तीन घरफोडीच्या गुन्ह्यांची उकल झाली. या कारवाईदरम्यान आरोपीकडून चोरीचे सुमारे 16 तोळे सोन्याचे दागिने आणि मोटारसायकल असा एकूण 24 लाख 30 हजार रुपये किमतीचा मुद्देमाल जप्त करण्यात आला आहे. पोलिसांनी दिलेल्या माहितीनुसार आरोपीविरुद्ध यापूर्वी महाराष्ट्र आणि मध्य प्रदेशात एकूण 14 घरफोडीचे गुन्हे दाखल आहेत. आरोपी सध्या शिक्रापूर पोलीस कोठडी रिमांडमध्ये आहे.
सदर कारवाई पुणे ग्रामीणचे पोलीस अधीक्षक संदीपसिंग गिल, अपर पोलीस अधीक्षक डॉ. शुभम कुमार, पुणे विभागाचे उपविभागीय पोलीस अधिकारी रवींद्र भोसले यांच्या मार्गदर्शनाखाली स्थानिक गुन्हे शाखेचे पोलीस निरीक्षक प्रमोद क्षीरसागर, पोलीस निरीक्षक चंद्रशेखर यादव, शिक्रापूर पोलीस ठाण्याचे सपोनि राहुल देशमुख, स्था.गु.शा.चे पोसई महेश डोंगरे, सफौ संजय पड्याळ, पोहवा तुषार पंदारे, पोहवा जनार्दन शेळके, पोहवा संजू जाधव, पोहवा राजू मोमीन, पोहवा विकास पाटील, पोको सागर धुमाळ,
शिक्रापूर पोलीस ठाण्याकडील पोसई उमाकांत कुंजर, पोलीस अंमलदार सहा फौजदार धनंजय थेऊरकर, पोहवा अमोल दांडगे, पोहवा शिवाजी चितारे, पोहवा रोहिदास पारखे, पोहवा अमोल नलगे, पोको मच्छिंद्र निचित, पोको नारायण वाळके, पोको राम जाधव, पोको भारत भोसले आणि पोअंल अस्मिता जोंधळे यांनी केली आहे.
