पुणे | प्रतिनिधी
तळेगाव दाभाडे रेल्वे स्थानकाच्या पार्किंग परिसरात बारामती येथील १८ वर्षीय तरुणीवर सामूहिक लैंगिक अत्याचार केल्याप्रकरणी दोषी ठरलेल्या शरद मुरलीधर सावळे आणि अंकितसिंग रतनसिंग बिस्त उर्फ कांचा या दोन आरोपिंना पुण्यातील विशेष न्यायालयाने नैसर्गिक मृत्यू होईपर्यंत जन्मठेप आणि प्रत्येकी २५ हजार दंड अशी कठोर शिक्षा सुनावली आहे.
सरकारी पक्षाने दिलेल्या माहितीनुसार, जानेवारी २०१६ मध्ये बारामती येथील १८ वर्षीय तरुणी तळेगाव दाभाडे रेल्वे स्थानकावर आली असता, तेथे पार्किंगमध्ये सुरक्षारक्षक म्हणून काम करणाऱ्या दोन्ही आरोपींनी तिची फसवणूक केली. “जेवण देतो” असे सांगून तिला पार्किंगलगतच्या कारशेडमध्ये नेण्यात आले. त्यानंतर दोघांनी तिच्यावर सामूहिक लैंगिक अत्याचार केल्याचा आरोप होता.
घटनेनंतर पीडितेने रेल्वे पोलिसांकडे तक्रार दाखल केली. पोलिसांनी तातडीने तपास सुरू करून दोन्ही आरोपींना अटक केली. तपास पूर्ण झाल्यानंतर न्यायालयात दोषारोपपत्र दाखल करण्यात आले.
खटल्यादरम्यान सरकारी पक्षाने पीडितेची साक्ष, वैद्यकीय पुरावे तसेच इतर परिस्थितीजन्य पुरावे न्यायालयासमोर सादर केले. उपलब्ध पुरावे आणि साक्षीदारांच्या जबाबांच्या आधारे विशेष न्यायालयाने दोन्ही आरोपींना दोषी ठरवत नैसर्गिक मृत्यूपर्यंत जन्मठेपेची शिक्षा सुनावली. तसेच प्रत्येकी २५ हजारांचा दंडही ठोठावण्यात आला. या निर्णयामुळे महिलांवरील गंभीर लैंगिक गुन्ह्यांविरोधात कठोर संदेश गेला आहे.
