अब्बास शेख
दौंड : केडगाव येथील गर्भलिंग निदान चाचणी प्रकरणामध्ये आता दररोज नवनवे खुलासे होऊ लागले असून यातील आरोपिंची संख्या दिवसेंदिवस वाढत चालली आहे. अण्णासाहेब गीरी गर्भलिंग निदान प्रकरणात या अगोदर यवत पोलिसांनी अण्णासाहेब गिरी, डॉ.अतुल जाधव, डॉ. मंदार माळी, डॉ.सुंदरम कदम, डॉ.ठाकरे, डॉ.संगीता गायकवाड, मदतनीस सदिच्छा शिंदे, गिरी याचा वाहनचालक अमित टेंगले, गिरीचा एजंट सचिन कदम अश्या ९ जणांवर गुन्हा दाखल केला असून या प्रकरणात आता अटक आरोपिंमध्ये पारगाव येथील डॉ.सुमंत तुकाराम शितोळे (मंगलमूर्ती हॉस्पिटल, पारगाव ता.दौंड) आणि त्याचा साथीदार बापूराव पंढरीनाथ जांबले (रा.वासुंदे, ता.दौंड) यांची भर पडली आहे. त्यामुळे या प्रकरणातील गुन्हा दाखल झालेल्या आरोपिंची संख्या आता ११ झाली आहे.
पोलिसांकडून मिळालेल्या माहितीनुसार, यातील प्रमुख आरोपी अण्णासाहेब गिरी हा ज्यावेळी गर्भलिंग निदान करायचा त्यावेळी त्याकडे गर्भलिंग निदान झालेले गर्भवती महिला डॉ.शितोळे हा आपल्या मंगलमूर्ती हॉस्पिटलमध्ये आणून त्यांचे बेकायदेशीर गर्भापात करायचा तसेच यातील आरोपी बापूराव जांबले हा या टीममध्ये एजंट म्हणून काम करायचा आणि तो गर्भपात करण्यासाठी लागणारी प्रतिबंधित आणि संवेदनशील औषधे यातील मुख्य आरोपिंना डॉ.गायकवाड हॉस्पिटल येथे पुरवण्याचे काम करायचा असा त्यांच्यावर ठपका ठेवण्यात आला आहे.
१ जुलै पर्यंत पोलिस कोठडी – यातील डॉ. शितोळे आणि एजंट जांबले या दोन्ही आरोपिंना यवत पोलिसांनी दौंड न्यायालयात हजर केले असता त्यांना १ जुलै पर्यंत पोलिस कोठडी सुनावण्यात आली आहे.
सदरची कामगिरी पुणे ग्रामिण पोलीस अधीक्षक संदिपसिह गिल, अपर पोलिस अधिक्षक बारामती विभाग गणेश बिराजदार, आर्थिक गुन्हे शाखेचे पोलिस उपाधीक्षक राजेंद्र मायने आणि दौंडचे पोलिस उपाधीक्षक बापूसाहेब दडस यांच्या मार्गदर्शनाखाली एसआयटी टीम आणि यवत चे पोलिस निरीक्षक संतोष तासगावकर यांनी केली असून पोलिस पथकाकडून अजूनही यातील अनेक आरोपिंना निष्पन्न करण्याचे काम सुरु आहे.
