लोणी काळभोर : PMRDA ची परवानगी न घेता अनधिकृत बांधकाम करणाऱ्यावर अखेर लोणी काळभोर पोलिस ठाण्यात गुन्हा दाखल करण्यात आला आहे. सदर व्यक्तीला पुणे महानगर प्रदेश विकास प्राधिकरण म्हणजेच पीएमआरडीए ने वारंवार नोटीस देऊनही त्याने बांधकाम न थांबवता ते चालूच ठेवल्याने त्याच्यावर कारवाई करण्यात आली आहे.
याप्रकरणी पुणे महानगर प्रदेश विकास प्राधिकरणाच्या (PMRDA) च्या अनधिकृत बांधकाम निर्मूलन व निष्कासन विभागातील कंत्राटी शाखा अभियंता प्रणव दिलीप डेंगळे यांनी फिर्याद दिली आहे. त्यानुसार हेमंत हाडके यांच्यावर लोणी काळभोर पोलिस ठाण्यात गुन्हा दाखल करण्यात आला असल्याची माहिती मिळत आहे. सदरच्या कारवाईमुळे आजूबाजूच्या तालुक्यातील अनेक लँड माफियांचे धाबे दणाणले असून त्यामुळे PMRDA हद्दीत येणाऱ्या अनेक तालुक्यांमध्ये सुरु असलेल्या अनधिकृत बांधकामांवर आणि ती सुरु ठेवणाऱ्या विकासकांवर सुद्धा अशीच कारवाई करण्याची मागणी होत आहे.
मिळालेल्या माहितीनुसार, कदमवाकवस्ती येथील एका गटात अनधिकृत बांधकामाबाबत अशोक खोले यांनी PMRDA कडे तक्रार दिली होती. त्यांच्या तक्रारीवरून pmrda च्या अधिकाऱ्यांनी स्थळपाहणी केली असता संबंधित ठिकाणी हेमंत हाडके यांचे बांधकाम सुरू असल्याचे त्यांच्या निदर्शनास आले. त्यानंतर पीएमआरडीएच्या अनधिकृत बांधकाम निर्मूलन विभागाकडून ६ एप्रिल २०२६ रोजी बांधकाम तात्काळ थांबविण्याची नोटीस बजावण्यात आली होती.
तसेच परवानगी प्राप्त होईपर्यंत कोणतेही पुढील बांधकाम करू नये, असे स्पष्ट निर्देशही देण्यात आले होते आणि आदेश न पाळल्यास फौजदारी कारवाईचा इशारा देण्यात आला होता. मात्र तरीही सदर व्यक्तीने बांधकाम न थांबवता सुनावणी प्रक्रिया सुरू असतानाही बांधकाम सुरूच ठेवले त्यामुळे पीएमआरडीएचे अधिकारी तथा तहसीलदार रविंद्र रांजणे यांच्या आदेशानुसार संबंधित प्रकरणाची गंभीर दखल घेण्यात येऊन आदेशाचे उल्लंघन करण्यात आल्याचा ठपका ठेवत हेमंत हडके यांच्याविरुद्ध कारवाई करण्यात आली आहे. या प्रकरणी लोणी काळभोर पोलीस ठाण्यात महाराष्ट्र प्रादेशिक नियोजन व नगररचना अधिनियम, १९६६ च्या कलम ५४ अन्वये गुन्हा दाखल करण्यात आला असून पुढील तपास सुरू आहे.
