केडगाव : दौंड तालुक्यातील केडगाव परिसरात असणाऱ्या टुले वस्ती आणि गलांडवाडी येथील तीन शिक्षकांनी राष्ट्रीय जनगणना करण्यास नकार दिल्याने त्यांच्यावर भा.न्या.सं. कलम 223 (अ), सह जनगणना अधिनियम 1948 चे कलम 11(1) व (2), प्रमाणे गुन्हा दाखल करण्यात आला असल्याची माहिती यवत पोलिसांनी दिली आहे. श्रीकृष्ण बाबासाहेब शिरसाट (वय 44 वर्ष, व्यवसाय नोकरी (मंडळ अधिकारी , पारगाव ता दौंड जि पुणे) यांनी याबाबत फिर्याद दिली आहे.
शिरसाट यांनी दिलेल्या फिर्यादीवरून
1) रामदास साहेबराव बारवकर (नेमणूक जि.प.प्रा. शाळा टुलेवस्ती ता दौंड जि पुणे)
2) सौ. सुवर्णा कानिफनाथ खळदकर
3) सौ. सिमा सुभाष साबळे (दोन्ही नेमणूक जि.प.प्रा. शाळा गलांडवाडी ता दौंड जि पुणे) या तीन शिक्षकांवर गुन्हा दाखल करण्यात आला आहे. यवत पोलिसांनी दिलेल्या माहितीनुसार ही घटना ता.16/5/2026 रोजी सकाळी 10.00 ते आजपर्यंत गलांडवाडी ब्लॉक नंबर 215 हद्दीत घडली आहे.
यातील आरोपी शिक्षकांनी आगामी राष्ट्रीय जनगणना 2027 करिता ता.16/5/2026 रोजी सकाळी 10.00 ते ता.14/06/2026 रोजी 18.00 या कालावधीकरिता गलांडवाडी ब्लॉक नंबर 215 (ता. दौंड जि पुणे) या हद्दीत अत्यंत महत्वाच्या आणि राष्ट्रीय कर्तव्याच्या कामासाठी प्रगणक म्हणून कायदेशीर नेमणूक केली असताना त्यांनी राष्ट्रीय जनगणनेचे शासकीय काम करणेस जाणीव पूर्वक नकार दिला आणि कामावर गैरहजर राहिले आहेत.
त्यामुळे कामात गंभीर कसुरी केली असून त्यांना व्हॉटसअप मॅसेजद्वारे कल्पना देवुनही त्यांनी आदेशाचे पालन केले नाही असे फिर्यादित म्हटले आहे. अधिक तपास पोलिस हवालदार मोहिते हे करीत आहेत.
