दौंड : दौंड तालुक्यातील वरवंड येथे असणाऱ्या एका सराफाचे सोन्या-चांदीचे दुकान अज्ञात चोरट्यांनी फोडून त्यामधून लाखो रुपयांचे दागिने चोरल्याची घटना समोर आली आहे.
ए बी सराफ असे या दुकानाचे नाव असून रात्री किंवा पहाटेच्या सुमारास अज्ञात चोरट्यांनी दुकानाचे शटर आणि आतील तिजोरी फोडून त्यातील मौल्यवान दागिने चोरल्याची माहिती समोर येत आहे. हे दुकान वरवंड येथील रहदारीच्या ठिकाणी असूनही चोरट्यांनी नागरिकांना कुठलीही चाहूल न लागू देता ही चोरी केली आहे.
चोरीची माहिती मिळताच घटनास्थळी यवत पोलीस दाखल झाले असून या घटनेची माहिती घेण्याचे काम त्यांच्याकडून सुरू होते. वरवंड येथे या अगोदरही जबरी चोरी, एटीएम फोडण्याच्या घटना घडल्या असून आता सराफाचे दुकान फोडल्याची घटना घडल्याने व्यापारी आणि नागरिकांमध्ये भीतीचे वातावरण आहे.
