अब्बास शेख
दौंड : आमदार राहुल कुल यांनी पाटस येथे कृषी उत्पन्न बाजार समितीसाठी राज्य शासनाकडे ४ हेक्टर जमिनीची मागणी केली होती. या मागणीला आणि त्यांनी केलेल्या पाठपुराव्याला आता मोठे यश आले असून मुख्यमंत्री देवेंद्र फडणवीस यांनी केलेल्या सूचनेनुसार आता कृषी उत्पन्न बाजार समितीसाठी पाटस येथे ४ हेक्टर जमीन मंजूर करण्यात आली आहे अशी माहिती महसूल मंत्री चंद्रशेखर बावनकुळे यांनी दिली आहे.
दौंडचे आमदार राहुल कुल यांनी मुख्यमंत्री देवेंद्र फडणीस, महसूल मंत्री चंद्रशेखर बावनकुळे यांच्याकडे मागणी व पाठपुरावा केल्यानंतर मुख्यमंत्री देवेंद्र फडणवीस यांच्या सूचनेनुसार पुणे जिल्ह्यातील पाटस येथील ४ हेक्टर गायरान जमीन कृषी उत्पन्न बाजार समिती, दौंड यांना बाजार आवार उभारणीसाठी नाममात्र ₹१ दराने प्रदान करण्याचा महत्त्वपूर्ण निर्णय महसूल विभागाने घेतला आहे.
या निर्णयामुळे शेतकऱ्यांना आधुनिक बाजारपेठेची सुविधा उपलब्ध होण्यास मदत होईल. तसेच कृषी मालाच्या खरेदी-विक्रीस अधिक गती मिळून परिसरातील कृषी अर्थव्यवस्थेला चालना मिळणार आहे. आमदार राहुल कुल यांच्या मागणीची त्वरित दखल घेऊन आदेश काढल्याने आमदार राहुल कुल यांनी मुख्यमंत्री देवेंद्र फडणवीस आणि महसूल मंत्री चंद्रशेखर बावनकुळे यांचे आभार मानले आहेत.
