अब्बास शेख
पुणे ग्रामिण : पुणे ग्रामीण पोलीस दलाच्या स्थानिक गुन्हे शाखेने अवैध अग्निशस्त्रांविरोधात विशेष मोहीम राबवत बारामती, इंदापूर आणि यवत परिसरात कारवाई करून तिघा आरोपींना अटक केली. त्यांच्या ताब्यातून चार गावठी पिस्तुले, सहा जिवंत काडतुसे असा एकूण १ लाख १९ हजार ५०० रुपयांचा मुद्देमाल जप्त करण्यात आला आहे. कोल्हापूर परिक्षेत्राचे विशेष पोलीस महानिरीक्षक रंजनकुमार शर्मा यांच्या निर्देशानुसार अवैध अग्निशस्त्र बाळगणाऱ्यांविरोधात विशेष मोहीम सुरू आहे. त्यानुसार पुणे ग्रामीणचे पोलीस अधीक्षक संदीप सिंह गिल यांच्या मार्गदर्शनाखाली स्थानिक गुन्हे शाखेच्या पथकाने ही कारवाई केली.
बारामतीत एक पिस्तूल जप्त – ९ जुलै रोजी बारामती विभागात गस्तीदरम्यान मिळालेल्या गोपनीय माहितीच्या आधारे रुई पाटीजवळ सापळा रचून ओम उर्फ लाला राजेंद्र कुंदांडे (वय २०, रा. भानगाव, ता. श्रीगोंदा) याला ताब्यात घेण्यात आले. त्याच्याकडून एक गावठी पिस्तूल व एक जिवंत काडतूस असा ५०,२०० रुपयांचा मुद्देमाल जप्त करण्यात आला. या प्रकरणी बारामती तालुका पोलीस ठाण्यात गुन्हा दाखल करण्यात आला आहे.
इंदापूरमध्ये दोन पिस्तुले हस्तगत – १० जुलै रोजी इंदापूर एसटी स्थानक परिसरात शाहरुख इस्माईल मुजावर (वय २५, रा. बावडा, ता. इंदापूर) याला ताब्यात घेण्यात आले. त्याच्याकडून दोन गावठी पिस्तुले व चार जिवंत काडतुसे असा ५०,८०० रुपयांचा मुद्देमाल जप्त करण्यात आला. याप्रकरणी इंदापूर पोलीस ठाण्यात गुन्हा नोंद करण्यात आला आहे.
यवतमध्ये आणखी एक आरोपी जेरबंद – पोलिसांनी यवत परिसरात कारवाई करून सनी कुमार केसरी प्रसाद (वय २५, मूळ रा. उत्तर प्रदेश) याला अटक करण्यात आली आहे. त्याच्याकडून एक गावठी पिस्तूल व एक जिवंत काडतूस असा १८,५०० रुपयांचा मुद्देमाल जप्त करण्यात आला. या प्रकरणी यवत पोलीस ठाण्यात गुन्हा दाखल करण्यात आला आहे.
तीन दिवसांत सात पिस्तुले जप्त – स्थानिक गुन्हे शाखेने गेल्या तीन दिवसांत सात गावठी पिस्तुले आणि २१ जिवंत काडतुसे जप्त करत अवैध अग्निशस्त्रांविरोधातील कारवाई अधिक तीव्र केली आहे. आरोपींनी ही शस्त्रे कोठून आणली आणि त्यामागील उद्देश काय होता, याचा पुढील तपास सुरू असून सर्व आरोपींना न्यायालयात हजर करण्यात आले आहे.
सदरची कामगिरी पुणे ग्रामिण पोलीस अधीक्षक संदीप सिंह गिल, अपर पोलीस अधीक्षक गणेश बिरादार, उपविभागीय पोलीस अधिकारी चैतन्य कदम (बारामती विभाग), उपविभागीय पोलीस अधिकारी बापूराव दडस (दौंड विभाग) यांच्या मार्गदर्शनाखाली पोलीस निरीक्षक प्रमोद क्षीरसागर (स्थानिक गुन्हे शाखा), पोलीस निरीक्षक नारायण पवार (बारामती तालुका पोलीस ठाणे) पोलीस निरीक्षक विलास नाळे (इंदापूर पोलीस ठाणे) पोलीस निरीक्षक संतोष तासगावकर (यवत पोलीस ठाणे), पो.उपनि. सुधीर वाळुंज श्रेणी पोसई बाळासाहेब कारंडे, पोलीस अंमलदार शिवाजी निकम, गुलाब पाटील, किशोर तेलंग, सचिन घाडगे, स्वप्नील अहिवळे, आसिफ शेख, शैलेश स्वामी, गणेश डेरे, सुलतान डांगे, रहीस मुलाणी, तुषार चव्हाण, गुरु गायकवाड, सुभाष राऊत, योगेश नागरगोजे
विकास कापरे यांनी केली आहे.
