पुणे : पुणे ग्रामीण दहशतवाद विरोधी पथक (एटीएस) ने सोमवार दिनांक १८ मे रोजी मांडकी ता.पुरंदर येथे छापा टाकून सुमारे २८ लाख रूपयांचा चंदनसाठा जप्त केलेला आहे. स्वतःला पुष्पा समजणाऱ्या आरोपीवर एटीएस पथकाने गुन्हा दाखल करत त्याने लपवलेला चंदन साठा हस्तगत केला आहे.
पुणे जिल्ह्याचे पोलीस अधीक्षक संदीपसिंह गिल्ल यांचे आदेशाने दहशतवाद विरोधी शाखेचे पथक जेजुरी पोलीस स्टेशन हद्दीत वेशांतर करून रेकॉर्डवरील संशयित आरोपीचा शोध घेत वाल्हे येथे आले होते. त्यावेळी या पथकास एका खबऱ्यामार्फत मांडकी, पाटीलवस्ती (ता.पुरंदर जि.पुणे) येथे विलास भोसले याच्या शेतात मोठ्या प्रमाणात चोरीचा चंदनाचा साठा लपवून ठेवला असल्याची बातमी मिळाली होती. त्याप्रमाणे मिळालेल्या बातमीवरून जेजुरी पोलीस स्टेशन कडील स्टाफ मदतीसाठी घेऊन मांडकी येथे विलास रावजी भोसले यांचे शेतात जावून शोध घेतला असता तेथे हिरवे कापडाच्या खाली लपवून ठेवलेले ५६० किलो वजनाचे चंदनाचे कापून ठेवलेले लाकडी ओंडके तसेच एक झाडे कापण्याचा बॅटरीवर चालणारा कटर व दोन लोखंडी ड्रील असा एकूण किंमत रुपये २८,०५,२००/- (अठ्ठावीस लाख पाच हजार दोनशे) चा माल मिळून आला.
सदर ठिकाणी अनधिकृतपणे चोरून आणलेला विक्रीचे उद्देशाने ठेवलेला चंदनाचा साठा पोलिसांनी जप्त केला. शेतीमालक विलास रावजी भोसले यांच्याकडे चौकशी केली सदरचे चंदन हे त्यांचा भाचा प्रतिक प्रमोद खुंटे (रा.मांडकी, पाटीलवस्ती ता. पुरंदर जि.पुणे) याने ठेवले असल्याचे सांगितले. त्याचा शोध घेतला असता तो मिळून आला नाही. याबाबत निष्पन्न आरोपी प्रतिक प्रमोद खुंटे याच्यावर जेजुरी पोलीस स्टेशनला बी.एन.एस. कलम ३०३(२), भारतीय वन अधिनियम १९२७चे कलम २६, ४१, ४२ सह महाराष्ट्र वृक्षतोड अधिनियम १९८८ चे कलम ३, ४ प्रमाणे गुन्हा दाखल करून कारवाई करण्यात आलेली असून पुढील तपास चालू आहे. गुन्ह्यातील आरोपी प्रतिक खुंटे हा रेकॉर्डवरील सराईत गुन्हेगार असून त्याच्यावर यापूर्वी सातारा जिल्ह्यात जबरी चोरीसारखे गंभीर गुन्हे दाखल आहेत.
सदर कामगिरी ही पुणे जिल्हा पोलीस अधीक्षक संदिपसिंह गिल्ल, बारामती अपर पोलीस अधीक्षक गणेश बिरादार, जेजुरी पोलीस स्टेशनचे सहा. पोलीस निरीक्षक दीपक वाकचौरे, दहशतवाद विरोधी पथकाचे सहाय्यक पोलीस निरीक्षक प्रकाश पवार यांचे मार्गदर्शनाखाली सहाय्यक पोलीस उपनिरीक्षक महेश गायकवाड, विशाल गव्हाणे, पोलीस हवालदार निलेश कदम, रविंद्र जाधव, पोलीस अंमलदार मोसीन शेख, ओंकार शिंदे, जालिंदर मुळीक व जेजुरी पोलीस स्टेशनचे पोलीस उपनिरीक्षक केशव जगताप यांचे पथकाने केलेली आहे.
केडगाव परिसरातील सराईत पुष्पा जेरबंद : चंदन तस्करीवर आधारित पुष्पा चित्रपट देशभरात गाजला हे आठवण्याचे कारण म्हणजे पुणे जिल्ह्यातही काही ‘पुष्पा’ कार्यरत आहेत. पुरंदर तालुक्यात झालेल्या या कारवाईत पोलिसांनी चंदनाचा मोठा साठा जप्त केला, मात्र यामागे आणखीन किती पुष्पा कार्यरत आहेत? याचा छडा लावण्याचे आव्हान पोलिसासमोर आहे. सुमारे तीन महिन्यापूर्वी केडगाव चौफुला परिसरातील पोलिसांचे रेकॉर्डवरील एक सराईत पुष्पा (रमेश करडे) याने यवत येथील आर्म ॲक्टचे गुन्ह्यातील एक आरोपी (फिरोज सय्यद) हा सुटल्यानंतर त्यास सोबत घेऊन मध्य प्रदेश येथील एक चंदन तेलाचा कारखाना लुटण्याचा कट रचला होता परंतु त्यांना पिस्टलचा धाक दाखवून चोरी करताना मध्यप्रदेश पोलिसांनी जेरबंद करून दरोड्याच्या गुन्ह्यात जेलमध्ये टाकले आहे.
