पुणे : सध्या सरकारी लोकसेवकांमध्ये लाच घेण्याचे प्रमाण कमालीचे वाढले आहे. प्रत्येक विभागात पुरुषांप्रमाणेच आता महिलाही मागे राहिलेल्या दिसत नाही. अशीच एक घटना आज पुण्यातील बावधन पोलिस ठाण्यात घडली असून ५० हजारांची लाच मागीतल्याप्रकरणी लाचलूचपत विभागाने त्यांना ताब्यात घेतले आहे.
श्रीमती ज्योती पांडुरंग तांबे (सहाय्यक पोलिस निरीक्षक, बावधन पोलीस स्टेशन) असे या आरोपी लोकसेवक महिला सहाय्यक पोलिस निरीक्षकांचे नाव असून त्यांनी तक्रारदार व त्यांचे नातेवाईक यांच्या विरुद्ध बावधन पोलीस स्टेशन येथे दाखल असलेल्या गुन्ह्यामध्ये तपास अधिकारी म्हणून मदत करण्यासाठी, नातेवाईकांना अटक न करण्यासाठी तसेच दोषारोपपत्र लवकर दाखल करण्यासाठी तक्रारदार यांच्याकडे 50 हजार रुपयांची लाच मागणी केली असल्याची तक्रार तक्रारदार यांनी दिली होती.
लाचलूचपत विभागाने याबाबत पडताळणी केली असता सदर बाब खरी निघाली त्यानंतर सहाय्यक पोलिस निरीक्षक श्रीमती ज्योती तांबे यांना ताब्यात घेऊन त्यांच्यावर गुन्हा दाखल करण्यात आला आहे. सदरची कारवाई लाचलूचपत विभागाच्या सहा.पोलिस आयुक्त श्रीमती निता मिसाळ यांच्या पथकाने केली असून पुढील तपास लाप्र विभागाचे पोलिस निरीक्षक सुहास हट्टेकर हे करीत आहेत.
