दौंड प्रतिनिधी : दौंड शहरातील सराईत व धोकादायक गुन्हेगार रितेश भीमराव गायकवाड (वय २७, रा. भीमनगर, ता. दौंड, जि. पुणे) याच्यावर महाराष्ट्र धोकादायक व्यक्ती प्रतिबंधक कायदा (एमपीडीए) अंतर्गत स्थानबद्धतेची कारवाई करण्यात आली आहे. जिल्हाधिकारी तथा जिल्हादंडाधिकारी, पुणे यांनी दिलेल्या आदेशानुसार त्याला नागपूर मध्यवर्ती कारागृहात दाखल करण्यात आले आहे.
पुणे ग्रामीणचे पोलीस अधीक्षक संदीपसिंह गिल यांनी जिल्ह्यातील गंभीर गुन्ह्यांमध्ये वारंवार सहभागी होणाऱ्या सराईत गुन्हेगारांवर एमपीडीए अंतर्गत कठोर कारवाई करण्याच्या सूचना दिल्या होत्या. त्यानुसार दौंड पोलीस ठाण्याच्या हद्दीतील रितेश गायकवाड याच्याविरुद्ध गंभीर स्वरूपाचे गुन्हे दाखल असल्याने त्याच्याविरोधात एमपीडीएची कारवाई प्रस्तावित करण्यात आली.
पोलीस नोंदीनुसार आरोपीविरुद्ध मारहाण, शस्त्रांच्या साहाय्याने दुखापत करणे, दरोडा, महिलांवरील अत्याचार, अल्पवयीन मुलीचा विनयभंग, पाठलाग (स्टॉकिंग), दमदाटी तसेच इतर गंभीर स्वरूपाचे एकूण सात गुन्हे दाखल आहेत. या गुन्ह्यांच्या पार्श्वभूमीवर तो सार्वजनिक सुव्यवस्थेस धोका ठरत असल्याचे प्रशासनाने नमूद केले आहे.
दौंड पोलीस ठाण्याचे पोलीस निरीक्षक हेमंत शेडगे यांनी एमपीडीए अंतर्गत कारवाईचा प्रस्ताव पोलीस अधीक्षकांकडे सादर केला होता. त्यानंतर आवश्यक कायदेशीर प्रक्रिया पूर्ण करून जिल्हाधिकारी यांनी ३१ जुलै २०२६ रोजी स्थानबद्धतेचा आदेश पारित केला. त्यानुसार २ ऑगस्ट २०२६ रोजी आरोपीला ताब्यात घेऊन नागपूर मध्यवर्ती कारागृहात दाखल करण्यात आले.
ही कारवाई पुणे ग्रामीण पोलीस अधीक्षक संदीपसिंह गिल, अपर पोलीस अधीक्षक, उपविभागीय पोलीस अधिकारी यांच्या मार्गदर्शनाखाली स्थानिक गुन्हे शाखा व दौंड पोलीस ठाण्याच्या अधिकारी व कर्मचाऱ्यांनी संयुक्तपणे पार पाडली.
