पुणे : पुणे जिल्ह्यातील भोर तालुक्यात असणाऱ्या नसरापूर येथे अवघ्या साडेतीन वर्षाच्या चिमुकलीवर अत्याचार करून तिचा निर्दयीपणे (Nasrapur Case) खून करणाऱ्या आरोपी भीमराव कांबळे (वय ६५) याला आज सोमवार दि. २९ जून रोजी फाशीची शिक्षा सुनावण्यात आली आहे. विशेष न्यायाधीश एस. आर. साळुंखे यांच्या न्यायालयाने गुरुवारी (दि.२५) कांबळेला या प्रकरणात दोषी ठरविले होते. त्यामुळे कांबळेला फाशी होणार की जन्मठेप, याकडे सर्वांचं लक्ष लागलं होतं. या शिक्षेमुळे अत्याचार करणाऱ्या नराधमांना जरब बसणार आहे.
हा गुन्हा घडल्यानंतर अवघ्या दोनच महिन्यात हा निकाल लागल्याने सर्वत्र समाधान व्यक्त होत आहे. नसरापूरचे नागरिक आणि मृत पीडितेच्या कुटुंबियांकडून कोर्ट आणि पोलिस यंत्रनांचे आभार मानले जात आहेत. दोन महिन्यांत खटल्याची सुनावणी पूर्ण आणि खून खटल्यात सर्वात जलदगतीने निकाली लागलेला हा राज्यातील पहिलाच खटला ठरला आहे.
काय होती घटना – महाराष्ट्रदिनी १ मे रोजी नसरापूर येथे एका साडेतीन वर्षाच्या मुलीवर अत्याचार करून तिचा निर्दयीपणे खून करण्यात आला होता. या घटनेनंतर संपूर्ण राज्यभरात संतापाची लाट पसरली होती. या घटनेनंतर पुणे ग्रामीण पोलिसांनी विशेष पोलिस पथक तयार करुन आरोपीला तातडीने अटक केली होती.
या प्रकरणात पुणे ग्रामिण पोलिसांनी अतिशय वेगवान गतीने तपास करत अवघ्या काही दिवसांत दोषारोपपत्र न्यायालयात दाखल केले होते. त्यानंतर विशेष न्यायालयाने २१ मेपासून या प्रकरणाची दररोज सुनावणी सुरू झाली होती. यावेळी सरकारी पक्षाने मुलीचे कुटुंबीय, प्रत्यक्षदर्शी साक्षीदार, पंच, तपास अधिकारी, न्यायवैद्यकीय तज्ज्ञ आणि डीएनए विश्लेषक यांच्यासह ५० हून अधिक साक्षीदारांची साक्ष नोंदवत त्याला फाशीची शिक्षा दिली आहे.
