केडगाव : दौंड तालुक्यात नावाजलेल्या संस्थांपैकी एक असणाऱ्या दौंड तालुका कृषी उत्पन्न बाजार समितीच्या वार्षिक सर्वसाधारण सभा आणि शेतकरी मेळाव्याचे आयोजन उद्या शनिवार दि. २६ सप्टेंबर २०२६ रोजी सकाळी ११ वाजता केडगाव येथील कृषी उत्पन्न बाजार समितीच्या आवारात करण्यात आले आहे. या सभेला दौंड चे आमदार राहुल कुल हे उपस्थित राहणार असून यावेळी विविध शेतकऱ्यांचा पुरस्कार देऊन सन्मान करण्यात येणार आहे.
या ठिकाणी शेतकऱ्यांच्या निगडित विविध समस्या, अडचणी समजून घेतल्या जाणार असून विविध उपक्रमांसह कांदा व डाळिंब उत्पादकांसाठी विशेष मार्गदर्शनाचे आयोजन करण्यात आले आहे. केडगाव येथे होणारी ही बाजार समितीची वार्षिक सर्वसाधारण सभा कृषी उत्पन्न बाजार समितीचे सभापती गणेश जगदाळे यांच्या अध्यक्षतेखाली पार पडणार असून यावेळी आमदार राहुल कुल यांच्या हस्ते तालुक्यातील २५ शेतकऱ्यांना ‘सुभाष अण्णा कुल कृषी भूषण’ पुरस्कार प्रदान करण्यात येणार आहे.
गेल्या तीन वर्षांपूर्वी दौंड तालुका कृषी उत्पन्न बाजार समितीची निवडणूक होऊन या समितीवर पहिल्यांदाचा आमदार राहुल कुल यांच्या गटाने निर्विवाद वर्चस्व मिळवले. ज्यावेळी कुल यांच्या मार्गदर्शनाखाली ही संस्था आली त्यावेळी या संस्थेला ७० लाख रुपये स्वनिधी होता तो आता ६ कोटी ९२ लाख इतका झाला आहे. गेल्या तीन वर्षांमध्ये या संस्थेने मोठ्या प्रमाणावर शेतकरी हिताचे निर्णय घेतले असून सध्या आर्थिक वर्ष २०२५-२६ मध्ये या संस्थेने विक्रमी अशी आर्थिक कामगिरी करत २ कोटी ५७ लाख रुपयांचा निव्वळ नफा कमवला आहे.
