दौंड : दौंड पोलिसांनी चार जिल्ह्यातून तडीपार केलेल्या आरोपीने दौंड शहरात येऊन दौंड पोलिसांना धक्काबुक्की केल्याची गंभीर घटना घडली आहे. दौंड पोलिसांनी या आरोपीला जेरबंद करत त्याच्यावर गुन्हा दाखल केला असून निखील बाळासाहेब जाधव (पोलिस हवालदार, दौड पोलीस ठाणे,पुणे) यांनी फिर्याद दिली आहे.
मिळालेल्या माहितीनुसार आरोपी महेश रमेश चोरमले (रा. गोपाळवाडी ता. दौंड जि.पुणे) याला रेवणनाथ लबडे, (उपविभागीय दंडाधिकारी दौंड, उपविभाग दौंड) यांचे न्यायालयाकडील जा.क्र.फौज/हद्दपार/एस.आर/01/2026 दि.18/03/2026 रोजी अन्वये मुंबई पोलीस अधिनियम 1951 चे कलम 56 (1), (अ), (ब) अन्वये (पुणे आयुक्तालय हद्दी व महानगरपालीका) हद्दीसह पुणे, सोलापुर, सातारा व अहिल्यानगर या चार जिल्ह्याच्या हद्दीतुन एक वर्षा करीता हद्दपार करण्यात आलेले होते.
मात्र आरोपीने मनाई असलेल्या क्षेत्रात विनापरवानगी प्रवेश केला. याची माहिती पोलिसांना समजताच त्यांनी त्याला ताब्यात घेत असताना आरोपीने जारी आदेशाची अवहेलना करुन फिर्यादी पोलिस व त्यांचे सोबतचे पोलीस स्टाफला धक्काबुक्की करुन पळुन जाण्याचा प्रयत्न करत त्यांच्या सरकारी कामात अडथळा आणला. दौंड पोलिसांनी सदर आरोपीला ताब्यात घेत त्याच्यावर गुन्हा दाखल केला असून पुढील तपास पोलिस हवालदार भोसले हे करीत आहेत.
