अब्बास शेख
केडगाव, दौंड : दौंड तालुक्यातील बोरीपार्धी-चौफुला हद्दीत यवत पोलिसांनी गांजाची बेकायदेशीर वाहतूक करणाऱ्या दोघांवर कारवाई करत तब्बल ४१ किलो १८ ग्रॅम गांजा जप्त केला आहे. या कारवाईत गांजासह एक स्विफ्ट डिझायर कार असा एकूण २५ लाख ५० हजार ९०० रुपयांचा मुद्देमाल पोलिसांनी ताब्यात घेतला आहे. सदर कारवाई ४ ऑक्टोबर २०२६ रोजी सायंकाळी पाचच्या सुमारास बोरीपार्धी गावच्या हद्दीत सुपे-केडगाव चौफुला रोडवरील दत्त मंगल कार्यालयाजवळ करण्यात आली.
पोलिसांनी दिलेल्या माहितीनुसार, हर्षवर्धन अशोक बरडे (वय २९, रा. काळेपडळ, हडपसर, मूळ रा. रायगाव, ता. करमाळा, जि. सोलापूर) आणि कुशाल दत्तात्रय बिनवडे (वय ३०, रा. काळेपडळ, हडपसर, मूळ रा. वंजारवाडी, ता. करमाळा, जि. सोलापूर) हे दोघे स्विफ्ट डिझायर कार मधून गांजाची वाहतूक करत असताना पोलिसांनी या कारची तपासणी केली असता दोन स्वतंत्र पोत्यांमध्ये प्लास्टिकच्या चिकटपट्टीने गुंडाळलेले गांजाचे बंडल आढळून आले.
यामध्ये अनुक्रमे २० किलो ५०० ग्रॅम आणि २० किलो ५१८ ग्रॅम, असा एकूण ४१ किलो १८ ग्रॅम गांजा मिळून आला. जप्त गांजाची अंदाजे किंमत २० लाख ५० हजार ९०० रुपये असल्याचे पोलिसांनी सांगितले. तसेच ५ लाख रुपये किमतीची स्विफ्ट डिझायर कार जप्त करण्यात आली आहे.
या प्रकरणी यवत पोलीस ठाण्यात अमली पदार्थ विरोधी कायद्यान्वये गुन्हा दाखल करण्यात आला असून या बाबतची फिर्याद विकास दशरथ कापरे (पोलीस हवालदार, स्थानिक गुन्हे शाखा, पुणे ग्रामीण) यांनी दिली आहे तर गुन्हा दाखल करण्याची कार्यवाही पोहवा शिंदे यांनी केली असून पुढील तपास सपोनि गाढवे करीत आहेत.
