सहजपूर, दौंड : पुणे-सोलापूर महामार्गालगत बोरीभडक गावच्या हद्दीत एका १८ वर्षीय तरुणीचा डोक्यात दगड घालून खून करण्यात आल्याची धक्कादायक घटना घडली आहे. या प्रकरणी यवत पोलिसांनी तिच्या पतीला अटक केली असून, आरोपीला न्यायालयाने १२ ऑगस्ट २०२६ पर्यंत पोलीस कोठडी सुनावली आहे.
पोलिसांनी दिलेल्या माहितीनुसार, आचल यादव (वय अंदाजे १८ वर्षे) हिचा खून करण्यात आला आहे. या प्रकरणी शंकर बकस सिंग (वय २२, रा. खवपुर, ता. मोहम्मदपूर, जि. अमेठी, उत्तर प्रदेश) याच्याविरुद्ध यवत पोलीस ठाण्यात गुन्हा दाखल करण्यात आला आहे.
ही घटना ७ ऑगस्ट २०२६ रोजी रात्री साडेनऊच्या सुमारास मौजे बोरीभडक गावच्या हद्दीत पुणे-सोलापूर महामार्गाच्या सोलापूरकडे जाणाऱ्या लेनपासून उत्तर बाजूस सुमारे १५० मीटर अंतरावरील मोकळ्या जागेत घडली. या प्रकरणी रोहन मच्छिंद्र गवळी (वय २२, व्यवसाय मजुरी) यांनी यवत पोलिसांत फिर्याद दिली आहे. फिर्यादी हे सध्या नायगाव, ता. हवेली येथे राहत असून मूळचे लातूर जिल्ह्यातील आहेत.
पोलिसांच्या माहितीनुसार, आचल यादव ही आरोपी शंकर बकस सिंग याची पत्नी होती. ती आरोपीला सोडून फिर्यादी रोहन गवळी यांच्यासोबत राहत असल्याचा राग आरोपीच्या मनात होता. या कारणावरून आरोपीने आचलला शिवीगाळ व दमदाटी करून जीवे मारण्याची धमकी दिली. त्यानंतर तिच्या डोक्यात दगड घालून तिचा खून केल्याचे फिर्यादीत नमूद करण्यात आले आहे.
घटनेची माहिती मिळताच यवत पोलिसांनी तपासाची चक्रे वेगाने फिरवत आरोपीला ८ ऑगस्ट रोजी अटक केली. आरोपीविरुद्ध भारतीय न्याय संहितेच्या कलमान्वये गुन्हा दाखल करण्यात आला आहे. आरोपीला १२ ऑगस्टपर्यंत पोलीस कस्टडी रिमांड मंजूर करण्यात आला आहे. या गुन्ह्याचा तपास पोलीस निरीक्षक संतोष तासगावकर यांच्या मार्गदर्शनाखाली पोलीस उपनिरीक्षक सागर माने करीत आहेत.
