केडगाव, दौंड : यवत पोलिसांनी गांजा तस्करीविरोधात कारवाई करत एका ६६ वर्षीय महिलेवर गुन्हा दाखल केला आहे. या कारवाईत पोलिसांनी तिच्याकडून तब्बल २ किलो १५० ग्रॅम वजनाचा गांजा, किंमत अंदाजे १ लाख ७ हजार ५०० रुपये, जप्त केला आहे.
यवत पोलीस ठाण्याचे सहायक पोलीस निरीक्षक आबा गाढवे यांना मिळालेल्या गोपनीय माहितीनुसार, पोलीस निरीक्षक संतोष तासगावकर यांच्या मार्गदर्शनाखाली पोलिस पथकाने ही कारवाई केली. ७ ऑगस्ट २०२६ रोजी दुपारी ३ वाजण्याच्या सुमारास दौंड तालुक्यातील खोपोडी, गरदडेवस्ती परिसरात पोलिसांनी सापळा रचून कारवाई केली.
या कारवाईत खोपोडी येथील ६६ वर्षीय महिलेकडून गांजा जप्त करण्यात आला आहे. सदर महिला स्वतःच्या आर्थिक फायद्यासाठी घरामध्ये गांजा बेकायदेशीररीत्या बाळगत असल्याचे पोलिसांच्या कारवाईत निष्पन्न झाले असून जप्त करण्यात आलेला गांजा पंचनामा करून ताब्यात घेण्यात आला आहे. या प्रकरणी पोलीस हवालदार संदीप देवकर यांनी यवत पोलीस ठाण्यात सरकारतर्फे फिर्याद दिली असून, पुढील तपास पोलीस निरीक्षक संतोष तासगावकर यांच्या मार्गदर्शनाखाली सहायक पोलीस निरीक्षक आबा गाढवे व पोलीस अंमलदार प्रतिक धिवार हे करीत आहेत.
ही कारवाई पुणे ग्रामीणचे पोलीस अधीक्षक संदीपसिंग गिल, अपर पोलीस अधीक्षक गणेश बिरादार आणि उपविभागीय पोलीस अधिकारी बापुराव दडस, पोलीस निरीक्षक संतोष तासगावकर यांच्या मार्गदर्शनाखाली यवत पोलिसांनी केली. या कारवाईत पोलीस उपनिरीक्षक मारोती मेतलवाड, पोलीस हवालदार संदीप देवकर, महेंद्र चांदणे, अमोल काळे, संदीप करे, पोलीस कॉन्स्टेबल धिरज जाधव, प्रतीक जगताप, मारुती बाराते तसेच महिला पोलीस कॉन्स्टेबल स्वप्नाली टिळवे यांनी सहभाग घेतला.
