अख्तर काझी
दौंड : केंद्र शासनाच्या पंतप्रधान आवास योजना चे प्रकल्प अभियंता विजय नाळे व सहकारी प्रशांत जगताप (दोघे राहणार श्रीगोंदा, जिल्हा अहमदनगर) यांना दहा हजार रुपयांची लाच घेताना लाच लुचपतच्या अधिकाऱ्यांनी रंगेहाथ पकडले आहे.
याबाबत सविस्तर माहिती अशी की विजय नाळे हे सदर योजनेचे प्रकल्प अभियंता म्हणून काम करतात. त्यांनी घरकुल योजनेचे मंजूर असलेले तक्रारदाराचे धनादेश काढण्यासाठी पन्नास हजार रुपयांची लाच मागितली होती तडजोडी अंती तीस हजारावर तडजोड केली गेली.
त्या पैकी पहिला हप्ता दहा हजार रुपये स्वीकारताना त्यांना दौंड नगरपालिका कार्यालयाखाली रंगेहाथ पकडण्यात आले.
सदरची कारवाई लाचलुचपत विभागाचे पोलीस निरीक्षक वीर नाथ माने व त्यांच्या सहकाऱ्यांनी केली. या कारवाईमुळे दौंड नगरपालिकेतील अधिकारी ,कर्मचारी वर्गामध्ये मोठी खळबळ उडाली.
