दौंड : दौंड शहरात असणाऱ्या ॲक्सिस बँकेच्या कॅश डिपॉझिट मशीनमध्ये पाचशे रुपयांच्या बनावट नोटा भरुन त्या वटविण्याचा प्रयत्न करणाऱ्या पाचजणांना दौंड पोलिसांनी अटक केली आहे. या सर्व आरोपिंना न्यायालयात हजर केले असता त्यांना माननीय न्यायालयाने सात दिवसांची पोलीस कोठडी सुनावली आहे.
१) हितेश चिदानंद चलवादी (वय 26, रा. पासलकरवस्ती, दौंड)
२) प्रेम संजय मंजुळे, (वय 23, रा. देहु आळंदी रोड, मोशी पुणे, मुळ रा. हनुमान नगर, दौंड) ३) विनोद विष्णू मुंडे (वय 29, सध्या रा. फ्लॅट नं. 105 वासुदेव हाईट्स, कुटेमळा, मानाजीनगर न-हे पुणे, मुळ रा. परळी वैजनाथ ता.परळी जि.बीड) ४) रणजीत भास्करराव डिग्रज, (वय 36, रा.स्पाईनसिटी सोसायटी प्लॅट नं. 608, भोसरी पुणे, मुळ रा. अकोल ता. जि अमरावती) आणि ५) ओमकार सतीष मोरे, (वय 22, रा. देवगाव ता. केज जि. बीड) अशी या प्रकरणातील पाच आरोपिंची नावे आहेत.
दौंड पोलिसांनी दिलेल्या माहितीनुसार यातील आरोपी चलवादी याने दौंड शहरातील ॲक्सिस बँकेच्या कॅश डिपॉझिट मशीनमध्ये ५०० रुपयांच्या १० बनावट नोटा असे पाच हजार रुपये भरले होते. सकाळी बँक उघडल्यानंतर हा संपूर्ण प्रकार बँक कर्मचाऱ्यांच्या निदर्शनास आल्यानंतर बँकेचे व्यवस्थापक महेश माने यांनी दौंड पोलीस ठाण्यात गुन्हा दाखल केला. यानंतर दौंड पोलिसांनी सीसीटीव्ही फुटेज आणि तांत्रिक पुराव्यांच्या आधारे तपास करून आरोपींच्या मुसक्या आवळल्या.
या प्रकरणात आरोपी हितेश चिदानंद चलवादी (रा.दौंड) याने या नोटा बँकेच्या डिपॉझिट मशीनमध्ये भरल्याचे समोर आले तर आरोपी प्रेम संजय मंजुळे, विनोद विष्णू मुंडे, रणजीत भास्करराव डिग्रज आणि ओमकार सतीश मोरे या आरोपिंचा या सर्व प्रकरणामध्ये समावेश असल्याचे निष्पन्न झाल्यानंतर दौंड पोलिसांनी या सर्व आरोपिंना अटक केली.
दौंड पोलिसांनी या आरोपिंना अटक करुन न्यायालयात हजर करत हे रॅकेट नेमके कुठून चालते, नोटांचा मुख्य पुरवठादार कोण आणि यामागे आणखी कोणाचे हात आहेत, याचा सखोल तपास करण्यासाठी पोलीस कोठडीची मागणी केली होती. न्यायालयाने पोलिसांची ही मागणी मान्य करत आरोपिंना सात दिवसांची कोठडी दिली आहे. या घटनेचा पुढील तपास दौंड पोलिस करीत आहेत.
