दौंड : दौंड तालुक्यातील केडगाव येथे राहणारा गर्भलिंग निदान प्रकरणातील मुख्य आरोपी अण्णासाहेब गिरी याला अटक झाल्यानंतर या प्रकरणात गुंतलेले अनेक डॉक्टर, सहकारी यांची नावे समोर आली आहेत. या प्रकरणात नुकतीच केडगावच्या डॉ.संगीता गायकवाड आणि सदिच्छा शिंदे या महिलेला अटक झाल्यानंतर आता एसआयटी पथक आणि यवत पोलिसांनी पुन्हा दोन तरुणांना अटक केली आहे.
मिळत असलेल्या माहितीनुसार तोतया डॉक्टर अण्णासाहेब गिरी याचा वाहन चालक म्हणून काम करणारा अमित टेंगले आणि पिग्मी एजंट म्हणून केडगाव परिसरात काम करणारा सचिन कदम या दोन तरुणांना एसआयटी आणि यवत पोलिसांनी अटक करुन त्यांना दौंड न्यायालयासमोर उभे केले असता या दोघांना माननीय न्यायालयाने २७ जूनपर्यंत पोलिस कोठडी सुनावली आहे. या दोन्ही तरुणांना अटक झाल्यानंतर आता यातील एजंट लोकांची साखळी समोर येऊन अनेकांची धरपकड होणार हे नक्की झाले आहे.
नुसते डॉक्टर, एजंट नको तर पत्नीचे गर्भलिंग निदान करुन घेणाऱ्या पतींवर सुद्धा कारवाई गरजेची – गर्भलिंग निदान चाचणी करणे हे कायद्याने गुन्हा आहे हे माहित असताना सुद्धा केवळ मुलाच्या हव्यासाने पत्नीच्या पोटातील गर्भलिंग निदान चाचणी करुन घेत, लिंग निदान झाल्यानंतर पत्नीचा गर्भपात करणे हा सरळ सरळ एका जीवाची हत्याच आहे त्यामुळे आता हे रॅकेट उघड होत असताना यातील पतीदेवांवर सुद्धा तशीच कारवाई व्हावी अशी मागणी सर्वसामान्य नागरिकांमधून होत आहे.
