पुणे : पुणे जिल्ह्यातील उरुळी कांचन, यवत आणि दौंड पोलीस स्टेशन हद्दीत रात्रीच्यावेळी दरोडा, जबरी चोरी, घरफोडी करणारी आंतरजिल्हा टोळी जेरबंद करून २० गुन्हे उघडकीस आणण्यास यवत पोलीस व स्थानिक गुन्हे शाखेच्या पथकाला यश आले आहे. या कारवाईत सुमारे १० तोळे सोन्याचे दागिने, मोटारसायकली असा एकुण ८ लाखाचा मुद्देमाल हस्तगत करण्यात यवत पोलीस आणि स्थानिक गुन्हे शाखा, पुणे ग्रामीण यांना यश आले आहे.
मिळालेल्या माहितीनुसार, दि. ०४/१०/२०२४ रोजी ९:३० च्या सुमारास कानगाव (ता. दौंड जि. पुणे) या गावच्या हद्दीमध्ये रेल्वेपुलाजवळ काही इसम हत्यारे व मोटार सायकली घेऊन दरोडा घालण्याच्या तयारीत असल्याची माहिती यवत पोलीस स्टेशन अंतर्गत असणाऱ्या पाटस दुरक्षेत्र येथील पोलीस उपनिरीक्षक सलीम शेख यांना स्थानिक गावक-यांनी दिली. पोलीस उपनिरीक्षक सलीम शेख यांनी सदर माहिती यवतचे पोलीस निरीक्षक नारायण देशमुख यांना दिली. पोलीस निरीक्षक नारायण देशमुख यांनी सदर ठिकाणी जाउन योग्य तीकारवाई करण्याच्या सुचना दिल्या.
सदर ठिकाणी पोलीस उपनिरीक्षक सलीम शेख तसेच स्टाफ व गुन्हे शोध पथक, यवत पोलीस स्टेशन यांनी जाउन पाहणी करत असताना येथील इसमांनी गावातील लोक त्यांच्याकडे येत असल्याचे पाहिले. यावेळी या संशईत चोरट्यांनी स्वतःच्या दोन्ही मोटार सायकलला आग लावून ते पळून जात जाऊ लागले. यावेळी त्यातील एका इसमांस पकडण्यात यश आले. त्यांच्याकडे अधिकची चौकशी केली असता त्याने त्याचे नावे सिध्दू रसिकलाल चव्हाण (वय १९ वर्षे, रा. इनामगाव ता. शिरूर जि. पुणे) असे असल्याचे सांगितले. त्याची अंगझडती घेतली असता त्याच्याकडे लोखंडी कोयता मिळुन आला. त्यास त्याच्याबरोबर असलेल्या इतर साथीदारांबाबत विचारले असता त्याने त्यांची नावे -१) दिपक रसिकलाल चव्हाण (रा. इनामगाव ता. शिरूर जि. पुणे) २) बाबुशा गुलाब काळे (वय २१ वर्षे, रा. शेडगाव ता. श्रीगोंदा जि. अहमदनगर) ३) प्रशांत फोटया उर्फ बंडू काळे (रा. राक्षसवाडी ता. कर्जत जि. अहमदनगर) ४) हनुमंत फोटया उर्फ बंडू काळे (रा. राक्षसवाडी ता. कर्जत जि. अहमदनगर) असे असल्याचे सांगितले.
पळुन गेलेल्या आरोपिंचा शोध घेतला असता त्यामधील बाबुशा गुलाब काळे (वय २१ वर्षे, रा. शेडगाव ता. श्रीगोंदा जि. अहमदनगर) हा दौंड पोलीस स्टेशन हद्दीत मिळुन आला. त्याच्याकडे चौकशी केली असता आम्ही सर्वजण कानगांव येथे दरोडा टाकण्याच्या उद्देशाने आलो होतो व अंधार होण्याची वाट पाहत होतो असे त्याने सांगितले. सदर बाबत यवत पोलीस स्टेशन येथे गुन्हा रजि नं ९७९ / २०२४ भारतीय न्याय संहिता सन २०२३ चे कलम ३१०(४)(५) प्रमाणे दाखल करून दोघांनाही अटक केले होते. सदर गुन्हयाचा तपास करत असताना त्यांना विश्वासात घेवुन त्यांच्याकडे चौकशी केली असता त्यांनी यवत, दौंड, उरुळी कांचन पोलीस स्टेशन हद्दीत रात्रीच्यावेळी घरफोडया, दरोडा, जबरी चो-या केल्या असल्याचे सांगितले. या तपासात एकुण २० गुन्हे उघडकीस आलेले असून तपासा दरम्यान गुन्ह्यातील चोरी केलेले सुमारे १० तोळे वजनाचे सोन्याचे दागिने व दोन मोटारसायकली असा मुद्देमाल हस्तगत करण्यात आला आहे.
सदरची कामगिरी पुणे ग्रामिण पोलीस अधिक्षक पंकज देशमुख, अपर पोलीस अधिक्षक गणेश बिरादार (बारामती विभाग) उपविभागीय पोलीस अधिकारी बापुराव दडस (दौंड विभाग) स्थानिक गुन्हे शाखेचे पोलीस निरीक्षक अविनाश शिळीमकर, यवत पोलीस स्टेशनचे पोलीस निरीक्षक नारायण देशमुख यांच्या मार्गदर्शनाखली सहा.पोलीस निरीक्षक राहुल गावडे, पोलीस उपनिरीक्षक सलीम शेख, पोलीस उपनिरीक्षक किशोर वागज, सहा.फौजदार महेंद्र फणसे, पोहवा. कानिफनाथ पानसरे, पोहवा. हिरालाल खोमणे, पोहवा. गुरूनाथ गायकवाड, पोहवा. संदीप देवकर, पोहवा. महेंद्र चांदणे, पोहवा. अक्षय यादव, पोहवा. रामदास जगताप, पोहवा. विकास कापरे, पोकॉ. मारुती बाराते, पोकॉ.गणेश मुटेकर तसेच स्थानिक गुन्हे शाखेचे पोहवा. सचिन घाडगे, पोहवा. शेख, पोहवा. अजित भुजबळ, पोहवा. योगेश नागरगोजे, पोहवा. विजय कांचन, पोहवा. राजु मोमीण यांनी केलेली आहे. आरोपी सध्या पोलीस कस्टडी रिमांड मध्ये असुन पुढील तपास यवत पोलीस स्टेशनचे पोलीस उपनिरीक्षक सलीम शेख हे करत आहेत.