दौंड : दौंड येथे कालीचरण महाराज यांच्या उपस्थितीमध्ये १ मे रोजी विराट हिंदू सम्मेलनाचे आयोजन करण्यात आले होते. यावेळी तथागत गौतम बुद्ध यांच्या मूर्तीसमोर देवीची आरती म्हणत मूर्तीला ओवाळण्यात आले होते त्यामुळे हि गौतम बुद्धांच्या मूर्तीची विटंबना आहे आणि ती मुद्दाम करण्यात आली असा आरोप दौंड शहरातील विविध आंबेडकरी संघटनांनी करत रविवार दि. ३ मे रोजी दौंड पोलीस स्टेशन समोर सुमारे तीन तास आंदोलन केले. यावेळी कालीचरण महाराज आणि अनुयायांवर गुन्हा दाखल करावा असे निवेदन दौंड पोलिसांना देण्यात आहे.
१ मे रोजी दौंड शहरात घेण्यात आलेल्या विराट हिंदू संमेलनात तथागत गौतम बुद्धांची मूर्ती ठेवून त्यासमोर देवीची आरती घेण्यात आली असा आरोप आंबेडकरी संघटनांनी केला होता. त्या आरतीचे व्हिडीओ व्हायरल झाल्यानंतर मात्र संबंधित आयोजक आणि कालीचरण महाराज यांनी मुद्दाम तथागत गौतम बुद्धांचा अपमान केला आणि त्यामुळे बौद्ध बांधवांच्या भावना दुखावल्याने या संमेलनाचे आयोजक व प्रमुख वक्ते कालीचरण महाराज यांच्याविरुद्ध धार्मिक भावना दुखावणे, सामाजिक आणि धार्मिक तेढ निर्माण केल्याप्रकरणी गुन्हा दाखल करावा यासाठी आंबेडकरी संघटनांनी दौंड पोलीस स्टेशनमध्ये ठिय्या आंदोलन केले.
या आंदोलनावेळी कालीचरण महाराज यांच्या विरुद्ध घोषणा देण्यात आल्या तसेच डॉक्टर बाबासाहेब आंबेडकर यांचा जयघोष करण्यात आला. या प्रकरणातील आरोपिंवर कठोर कारवाई करावी अन्यथा दौंड शहरात बंद पाळला जाईल असा ईशारा निवेदनातून देण्यात आला आहे. दौंड पोलीस ठाण्याचे पोलीस निरीक्षक गोपाळ पवार यांना विविध आंबेडकरी संघटनांनी एकत्रित येऊन निवेदन देत गुन्हा दाखल करुन कारवाईची मागणी केली आहे.
