दौंड : महाराष्ट्र शासनाच्या महसूल विभागामार्फत मुख्यमंत्री यांच्या वाढदिवसानिमित्त तसेच माजी उपमुख्यमंत्री स्व. अजितदादा पवार यांच्या प्रथम जयंतीनिमित्त ‘श्री छत्रपती शिवाजी महाराज महाराजस्व समाधान शिबीर’ आयोजित करण्यात आले आहे. हे शिबिर उद्या शुक्रवार, दि. ३१ जुलै २०२६ रोजी सकाळी १० वाजता श्री बोरमलनाथ मंदिर सभागृह, बोरीपार्धी (ता. दौंड, जि. पुणे) येथे होणार आहे.
या कार्यक्रमाच्या अध्यक्षस्थानी आमदार ॲड. राहुल कुल उपस्थित राहणार असून महसूल विभागासह विविध शासकीय विभागांचे वरिष्ठ अधिकारी आणि तालुक्यातील सर्व विभागप्रमुख हे नागरिकांच्या समस्या प्रत्यक्ष ऐकून त्यांचे निराकरण करणार आहेत.
या शिबिरात महसूल विभाग व इतर शासकीय कार्यालयांशी संबंधित विविध प्रलंबित प्रकरणांचा निपटारा, आदेशांचे वितरण तसेच विविध शासकीय योजनांचा लाभ नागरिकांना एकाच ठिकाणी उपलब्ध करून दिला जाणार आहे. त्यामुळे दौंड तालुक्यातील जास्तीत जास्त नागरिकांनी या शिबिराचा लाभ घ्यावा, असे आवाहन दौंड प्रशासनाने केले आहे.
शिबिरातील प्रमुख सेवा व योजना
- महिला शेतकरी दर्जा योजनेअंतर्गत प्रमाणपत्रांचे वितरण.
- स्वामित्व योजनेअंतर्गत गावठाणातील नागरिकांना मालकी हक्काच्या सनदींचे वितरण.
- मुख्यमंत्री बळीराजा शेत/पाणंद रस्ते योजना.
- शासकीय जमिनीवरील निवासी अतिक्रमणे नियमित करण्याबाबत कार्यवाही.
- स्थानिक क्षेत्र घोषणा व तुकडेबंदी कायद्याची अंमलबजावणी.
- ‘जिवंत सातबारा’ मोहीम.
- राजमाता जिजाऊ महिला सक्षमीकरण योजना.
- घरकुल योजनेतील लाभार्थ्यांना विशेष सवलती.
- कुंभार समाजासाठी पारंपरिक व्यवसायासंदर्भातील सवलती.
- शेतजमिनीच्या कौटुंबिक वाटणीपत्रावरील नोंदणी शुल्क पूर्णपणे माफ.
- संजय गांधी योजनेतील लाभांचे वितरण.
- भटके-विमुक्त, आदिवासी, वंचित समाज तसेच विद्यार्थ्यांना जातीसह विविध दाखल्यांचे वितरण.
- महसुली प्रकरणांचा निपटारा व आदेश वितरण.
- फार्मर आयडी नोंदणी व अद्ययावत करणे.
- शेतकरी कर्जमाफीसाठी ई-केवायसी.
- आधार अद्ययावतीकरण.
- कृषी, सहकार व इतर विभागांच्या विविध योजनांचा लाभ.
दौंड तालुक्यातील नागरिकांनी आवश्यक कागदपत्रांसह उपस्थित राहून शासनाच्या विविध योजनांचा लाभ घ्यावा, असे आवाहन प्रशासनाने केले आहे.
