दौंड : सासरच्या छळास कंटाळून वैष्णवी अजिंक्य कांबळे (वय 25 वर्षे, रा. डाळिंब ता. दौंड जि. पुणे) या विवाहितेने आत्महत्या केल्याची घटना डाळिंब (ता.दौंड) येथे घडली आहे. या प्रकरणी मयत महिलेच्या पतीसह तिच्या सासरच्या लोकांवर गुन्हा दाखल करण्यात आला आहे.
याबाबत श्रीमती आशा संतोष साबळे, (वय 45 वर्षे, रा.देवळाली प्रवरा ता. राहुरी जि. अहिल्यानगर) यांनी फिर्याद दिली असून त्यांनी दिलेल्या फिर्यादीनुसार आरोपी 1) अजिंक्य भाउसो कांबळे, 2) भाउसो कांबळे, 3) लक्ष्मीबाई कांबळे, 4) शेखर भोसले, 5) स्वप्नील भाउसो कांबळे (सर्व रा. डाळिंब ता. दौंड जि. पुणे) 6) सूर्यकांत कदम (राहणार उरुळी कांचन तालुका दौंड जिल्हा पुणे) यांच्यावर गुन्हा दाखल करण्यात आला आहे. यातील तीन आरोपिंना यवत पोलिसांनी गुन्ह्याच्या तपासकामी ताब्यात घेतले आहे.
यवत पोलिसांकडून मिळालेल्या माहितीनुसार, वरील आरोपिंनी फिर्यादी यांची मयत मुलगी वैष्णवी अजिंक्य कांबळे (वय 25 वर्षे, रा. डाळिंब ता. दौंड जि. पुणे) हिला संगणमत करून वेळोवेळी तिला उपाशीपोटी ठेवून, हाताने मारहाण करून, तिचा शारिरीक व मानसिक छळ करत आत्महत्येस प्रवृत्त केले असल्याचे फिर्यादित म्हटले आहे. पुढील तपास पोसई अक्षय मोरे हे करीत आहेत.
