पुणे : सहकारनामा ऑनलाईन(अब्बास शेख)
– गेल्या एक महिन्यापासून दौंड तालुक्यातील महामार्गावर खून, दरोडे, वाटमारी करून लोकांना लूटमार करणारी टोळी पुणे ग्रामीण पथकाच्या स्थानिक गुन्हे अन्वेषण विभाग (LCB)कडून अवघ्या 48 तासात जेरबंद करण्यात आली आहे. आरोपींना पकडण्यासाठी पोलिसांनी दोन किमी पर्यंत थरारक पाठलाग करून जेरबंद केले आहे.
याबाबत स्थानिक गुन्हे शाखेचे वरीष्ठ पोलीस निरीक्षक पद्माकर घनवट यांनी माहिती दिली असून पुणे ग्रामीण स्थानिक गुन्हे शाखा (एल.सी.बी.) पथकाने दोघांना जेरबंद करून जिवनावश्यक वस्तुची वाहतुक करणाऱ्या ट्रक चालकाचे खुनासह दरोडयाचा गुन्हा ४८ तासात उघडकीस आणला असून इतर दरोडयाचा १, जबरी चोरीचे २ व चोरीचे २ असे एकूण ६ गुन्हे उघडकीस आणले आहेत. दि.३० मार्च रोजी रात्री ०१.२० वा.चे सुमारास मौजे मळद ता.दौंड जि.पुणे गावचे हद्दीत रेल्वे उड्डाणपुलाजवळ सोलापुर-पुणे हायवे रोडलगत लातूर ते पुणे मार्केटयार्ड अशी डाळ वाहतुक करणारा ट्रक नं एमएच-२५ यु ४२०१ वरील चालक काशिनाथ रामभाऊ कदम वय ५५ वर्षे रा.ढोकी ता.कळंब जि.उस्मानाबाद हे ट्रक रोडचे कडेला लावून लघुशंखेसाठी जावून परत येत असताना सब रोडने पायी येणारे पाच ते सहा अनोळखी इसमांनी त्याचे छातीवर चाकूने वार करुन त्याचे जवळील रोख रक्कम तीन हजार रुपये व मोबाईल तसेच त्याचे अगोदर त्याच ठिकाणी थांबलेला टेम्पो नं एमएच-१२ एचडी १३११ ची केबीनची काच फोडून टेम्पो क्लीनर महंमद मेहबुब पठाण वय ४९ वर्षे रा.उस्मानाबाद याचे खिशातील मोबाईल व त्याच टेम्पोचा ड्रायव्हर अल्ताफ खैयुम पटेल याचे खिशातील रोख २०००/- रुपये पाकीट असा एकुण किमत रु ७०००/- रु. चा माल जबरीने चोरुन नेला होता. सदर घटनेत ट्रक चालक काशिनाथ रामभाऊ कदम यांना छातीवर चाकूचे वार झालेने औषधोपचारास घेवुन जात असताना रस्त्यात मयत झाले होते तसेच दुसऱ्या घटनेतील टेम्पो क्लीनर महंमद मेहबुब पठाण यास जबर जखमी झालेने दोंड रुग्णालय येथे अॅडमीट केले होते. सदर घटनेबाबत काशिनाथ रामभाऊ कदम या मयत ड्रायव्हरच्या क्लिरने फिर्याद दिली होती. सदर तक्रारी वरून दौंड पोलीस स्टेशनला खुनासह दरोड्याचा गुन्हा दाखल करण्यात आलेला होता. गुन्हा करताना आरोपींनी कोणताही पुरावा मागे ठेवलेला नव्हता. त्यामुळे सदर गुन्हा उघडकीस आणणे हे पोलीसांसमोर मोठे आव्हान होते. मागील १५ दिवासात सोलापूर रोडला लुटमारीच्या प्रमाणात वाढ झाली होती. सोमवारी घडलेल्या घटनेत ट्रक चालक मयत असल्याने प्रकार गंभीर स्वरूपाचा होता. कोरोना प्रतिबंध ड्युटीचा ताण पोलीसांवर असूनदेखील रात्र गस्त सक्त करूनही गुन्हे घडत होते. सदर गंभीर गुन्हा उघडकीस आणणेकामी पुणे जिल्हा पोलीस अधीक्षक संदिप पाटील, बारामती अपर पोलीस अधीक्षक जयंत मिना, दौंड एसडीपीओ ऐश्वर्या शर्मा यांनी गुन्हयाचे घटनास्थळी भेट देवून दौंड पोलीस स्टेशन, एलसीबी व बारामती विभागाची वेगवेगळी पथके नेमून त्यांना गुन्हा उघडकीस आणणेबाबत सुचना दिलेल्या होत्या. त्याप्रमाणे स्थानिक गुन्हे शाखेचे वरीष्ठ पोलीस निरीक्षक पद्माकर घनवट यांचे मार्गदर्शनाखाली नेमलेले गुन्हे शाखेचे पोलीस पथकाने समांतर तपासात गुन्हयाची माहिती घेवून पुणे, अहमदनगर, सोलापूर येथे जावून वेशांतर करून गोपनीय खबऱ्यामार्फत माहिती काढून गुन्हा केलेले व पूर्वीचे रेकॉर्डवरील असलेले आरोपी निष्पन्न केले. त्यानंतर दौंड पो.स्टे.चे पोलीस निरीक्षक सुनिल महाडीक यांचेमार्फत त्यांचेकडील डी.बी. पथकाची मदत घेवून आरोपी समाजाच्या वस्त्या चेक करताना आरोपी पळू नये म्हणून अॅम्बुलन्सचा वापर करून मेडीकल स्टाफचा वेश परिधान करून वाडया, वस्त्या चेक करीत असताना आरोपी गोपाळवाडी-पाटस रोड, दौंड येथे येणार असल्याची माहिती मिळालेवरून तात्काळ त्या ठिकाणी जावून आरोपी पोलीसांची चाहूल लागलेने पळून जाताना सुमारे २ कि.मी. सिनेस्टाइल पाठलाग करून आरोपी १)गणेश अजिनाथ चव्हाण वय २२ वर्षे रा.बोरावकेनगर, दौंड ता.दौंड जि.पुणे २)समीर उर्फ सुरज किरण भोसले वय १९ वर्षे रा . गोपाळवाडी-पाटस रोड, दौंड ता.दौंड जि.पुणे या दोघांना ताब्यात घेतलेले आहे. त्यांचेकडे सदर गुन्हयाचे अनुषंगाने प्राथमिक चौकशी करून पोलीसी खाक्या दाखवताच त्यांनी त्यांचे इतर साथीदार यांचेसह दोन दिवसापूर्वी सोलापूर रोडला मळद येथे पुलाजवळ थांबलेल्या ट्रकचालकास चाकूने भोकसून त्याचेकडील पैसे व मोबाईल लुटुन त्याचे पाठीमागे थांबलेल्या टेम्पोची काच फोडून त्यांचेकडील मोबाईल पैसे लुटल्याचे सांगितले. तसेच त्याचे आदल्या दिवशी खडकी येथे एका कार्यालयासमोर थांबलेल्या छोटा हत्ती टेम्पोमधील एकाचे डोक्यावर चाकूने मारुन पैसे, मोबाईल, बॅगा व महिलांचे दागिने लूटल्याचे सांगून ८ दिवसापूर्वी वरवंड येथील एका हॉटेलसमोरुन मोटरसायकलची चोरी करुन हॉटेलमागे असलेल्या एमएसईबी पॉवरहाऊस येथील वॉचमनला गजाने डोक्यात मारहाण करुन मोबाईल व पैसे लुटल्याचे सांगितले. १० दिवसापूर्वी लिंगाळी येथून एक पॅशन प्रो मोटरसायकल चोरल्याचे सांगितले. तसेच सुमारे १५ दिवसापूर्वी स्वामीचिंचोली येथे एका हॉटेलसमोर लघवीसाठी थांबलेल्या दोघांपैकी एकास कुऱ्हाडीने मारहाण करून चाकूचा धाक दाखवून त्यांचेकडील मोबाईल व पैसे लुटल्याचे सांगितले आहे.
सदरबाबत दौंड व यवत पोलीस स्टेशनला खुनासह दरोडयाचा १ तसेच दरोडयाचा १, जबरी चोरीचे २ व चोरीचे २ असे एकूण ६ गुन्हे दाखल आहेत. यातील आरोपी गणेश चव्हाण हा सध्या शिक्रापूर व दौंड पोलीस स्टेशनचे जबरी गुन्हयात फरारी आहे. सदर आव्हानात्मक गुन्हयाचा कौशल्यपूर्ण तपास स्थानिक गुन्हे शाखेचे वरिष्ठ पोलीस निरीक्षक पद्माकर घनवट यांचे मार्गदर्शनाखाली सहा.पोलीस निरीक्षक दत्तात्रय गुंड, अनिल काळे, रवि कोकरे, महेश गायकवाड, निलेश कदम, सचिन गायकवाड, ज्ञानेश्वर क्षिरसागर, सुभाष राऊत, गुरु गायकवाड, ज्ञानदेव क्षिरसागर, काशिनाथ राजापुरे, दौंड पोलीस स्टेशनचे असिफ शेख, सुरज गुंजाळ व श्रीगोंदा पोलीस स्टेशनचे अंकुश ढवळे यांनी करून गुन्हा उघडकीस आणून उल्लेखनीय कामगिरी केलेली आहे. त्याबद्दल पोलीस अधीक्षक यांनी तपास पथकास बक्षिस जाहिर केले आहे. सदर दोन्ही आरोपींना पुढील कारवाईसाठी दौंड पोलीस स्टेशनचे ताब्यात देण्यात आलेले आहे. आरोपींनी आणखीन गुन्हे केल्याची शक्यता असून त्याबाबत पुढील अधिक तपास पोलीस निरीक्षक सुनिल महाडीक हे करीत आहेत.