अब्बास शेख
दौंड तालुक्यातील भीमा पाटस सहकारी साखर कारखाना हा येथील सभासद, शेतकऱ्यांच्याच मालकीचा असून आम्हाला नफा नाही तर शेतकऱ्यांचे हित जपायचे आहे असे परखड मत निराणी शुगर ग्रुप चे चेअरमन मुरुगेश निराणी यांनी व्यक्त केले. ते भीमा पाटस सहकारी साखर कारखान्याच्या ४३ व्या ऊस गळीत हंगामाच्या शुभारंभावेळी बोलत होते.
यावेळी मुरुगेश निराणी यांनी पुढे बोलताना, मी आज फक्त कारखान्याबद्दल बोलायला आलो नाही तर या कारखान्याचे खरे मालक असलेल्या सभासद, शेतकरी यांना भेटायला आलो आहे. तुम्हाला आमदार राहुल कुल यांसारखे उमदे नेतृत्व लाभले आहे. भीमा पाटस कारखाना चालवायला आम्हाला मुख्यमंत्री देवेंद्र फडणवीस यांच्या आग्रहाखातर संधी मिळाली त्यामुळे आम्हाला राहुल कुल यांच्या रुपाने एक चांगला मित्र मिळाला. आम्हाला अनेक कारखाने चालवायची ऑफर होती मात्र फडणवीस साहेबांचा आग्रह होता की हा कारखाना तुम्ही चालवायला घ्यावा. मात्र इतक्या लांबून कारखाना चालवायचा कसा, सगळं व्यवस्थित होईल का अश्या अनेक शंका मनात होत्या मात्र ज्यावेळी कारखान्याचे चेअरमन आणि आमदार राहुल कुल यांची समोर भेट झाली त्यावेळी सर्व शंका दूर झाल्या आणि ते आमचे एक फॅमिली मेंबर बनले.
हा कारखाना जो चालवायला घेतला तो प्रोफेट आणि लॉस साठी नाही तर देवेंद्र फडणवीस आणि आमदार राहुल कुल यांच्या मैत्री खातीर हा कारखाना चालवायला घेतला आहे. पुढच्या वर्षीपासून विविध प्रकल्पांसह १५ हजार टन गाळप क्षमता करण्याचा विचार आहे. दादा फडणवीसांना म्हणत असायचे की एक वेळ मला मंत्रिपद देउ नका पण भीमा पाटसला सहकार्य करा. आज माझ्या मुलाचा वाढदिवस आहे मात्र मी येथे आलो आहे त्याचे कारण तुमचे प्रेम. उसाच्या भावाबद्दल बोलताना त्यांनी सांगितले की, तुम्ही बसून जो भाव ठरवताल तो मला मान्य राहील. आम्हाला आमचा फायदा नाही तर भीमा पाटस कारखाना आणि त्याच्या ऊस उत्पादक शेतकऱ्यांचा फायदा करायचा आहे. आमचा जेवढा प्रोफेट होत असेल तो सुद्धा आम्ही शेतकऱ्यांना द्यायले तयार आहे असल्याचे सांगून येथे वेगवेगळे प्रोजेक्ट, प्रकल्प सुरु करत असून पुढील वर्षांपासून हा कारखाना चांगल्या फायद्यात राहील आणि सर्वांना न्याय मिळेल असे ऊस उत्पादक शेतकऱ्यांना आश्वस्त केले.
मुरुगेश निराणी यांच्या अगोदर आमदार ॲड.राहुल कुल यांनी बोलताना मुख्यमंत्री देवेंद्र फडणवीस साहेब यांचे विशेष आभार मानतो. त्यांनी निराणी ग्रुप सोबत काम करायची संधी उपलब्ध करुन दिली. देशातील सर्वात मोठ्या ग्रुप पैकी निराणी हा एक ग्रुप आहे तर इथेनॉल मध्ये त्यांचा आशियात वरचा नंबर लागतो. मुरुगेश निराणी हे कामात अग्रेसर असे व्यक्तिमत्व आहे. मी त्यांचे आभार मानतो की त्यांनी अडचणीत असणारा कारखाना चालवायला घेतला. पावसाबद्दल बोलताना त्यांनी, गेल्या २५ वर्षांत सप्टेंबर महिन्यात दौंड तालुक्यात पाऊस झाला नाही असे घडले नाही यावेळी मात्र पावसाची साथ लाभली नाही. मुळशी, टाटा चे पाणी लवकरच डायव्हर्ट होणार आहे. यामुळे ११० दिवस पाणी आपल्याकडे जास्त येईल यात शंका नाही. २ हजार कोटी रुपयांचे खडवासला टनेलचे काम सुरु असून साधारण ६ किमी काम झाले आहे. भविष्यात दौंड तालुक्याला शेती आणि पिण्याच्या पाण्याची अडचण येणार नाही असे प्रयत्न सुरु होते ते आता सत्यात उतरणार आहेत त्यामुळे १८ हजार एकर ऊस शेती वाढणार आहे.
तालुक्यातील शेतकऱ्यांनी चिबड जमिनीचे अर्ज लवकर पाठवावे हा पायलट प्रोजेक्ट आहे यामुळे शेतकऱ्यांना मोठा फायदा होणार आहे असे आमदार कुल यांनी म्हणत शहराला जोडणारे ग्रामिण भागातील सर्व रस्ते आता मोठे आणि गतिमान होणार आहेत. मधुकका शितोळे यांचे विशेष सहकार्य लाभले. देवेंद्र फडणवीस साहेबांसह अजितदादांचे विशेष आभार मानतो कारण अजितदादांनी कारखाना सुरु होण्यासाठी जी जी आश्वासने दिली ती पूर्ण केली त्यामुळे त्यांना विशेष धन्यवाद देतो असे म्हणत त्यांनी ‘ऊस दराचा आग्रह धरा, मात्र ऊस आपल्या कारखान्यालाच घाला’ असेही आवाहन सभासद, शेतकऱ्यांना केले. तीनवेळा मंत्रीपदाचे आश्वासन मिळाले मात्र मंत्रिपद मिळाले नाही पण मी नाराज झालो नाही तर काम करत राहिलो. मंत्रिपद नाही मिळाले तरी चालेल मात्र भीमा पाटस कारखाना सुस्थितिमध्ये सुरु व्हावा ही माझी आग्रही मागणी असायची. बँकेच्या अडचणी राहणार नाहीत असे निश्चित सांगतो. दौंड मार्केट कमिटीला पाच वर्षांत जिल्ह्यातील टॉप ची मार्केट कमिटी बनवणार असे सांगत सर्व शेतकऱ्यांनी आपला ऊस भीमा पाटसला द्यावा असे आवाहन आमदार राहुल कुल यांनी केले.
कार्यक्रमाच्या सुरुवातीला निराणी शुगर ग्रुपचे एक्झिक्युटीव्ह डायरेक्टर संगमेश निराणी यांनी बोलताना, आजचा दिवस आमच्या सर्वांसाठी आनंदाचा आहे. कारण आज मुरुगेश निराणी यांचा मुलगा विशाल निराणी यांचा वाढदिवस आहे आणि आजच भीमा पाटस चा ४३ वा ऊस गळीत हंगामाचा शुभारंभ आहे हा आमचा आनंद द्विगुणित करणारा असा योग आहे असे म्हणत त्यांनी आमदार राहुल कुल आणि भीमा पाटस कामगारांचे विशेष कौतुक केले. आमदार राहुल कुल यांसारखे व्यक्तिमत्व आमचे मित्र आहेत याचा आम्हाला अभिमान आहे. भीमा पाटस कारखान्याला हा आम्ही संपूर्ण भारत देशात रोल मॉडेल बनवणार आहोत यासाठी आम्हाला सर्वांचे सहकार्य गरजेचे आहे. पुढील वर्षी कोजेन, सीएनजी, सिबिजी असे वेगवेगळे प्रकल्प येथे सुरु होणार आहेत. त्यामुळे येथे जास्तीत जास्त ऊस गाळपाचे उद्दिष्ट असून यासाठी सर्व ऊस उत्पादक शेतकऱ्यांनी सहकार्य करावे आम्ही सर्वांना चांगला बाजारभाव देउ असे आश्वस्त करतो असे त्यांनी सांगितले.
यावेळी शेतकरी नेते शिवाजी नांदखिले, अप्पासाहेब पवार यांनी आपले मनोगत व्यक्त केले. या कार्यक्रमासाठी मुरुगेशजी निराणी (चेअरमन, निराणी शुगर्स, मा.कॅबिनेट मंत्री कर्नाटक राज्य) बी.सी पाटील (मा.कृषीमंत्री, कर्नाटक राज्य तथा चित्रपट अभिनेते) दौंडचे आमदार ॲड.राहुल कुल, संगमेशजी निराणी (एकझक्युटीव्ह डायरेक्टर निराणी शुगर्स, लि.) माजी आमदार रंजनाताई कुल, सौ.कांचनताई कुल, द्राक्षायनी संगमेश निराणी, व्हा.चेअरमन नामदेवनाना बारवकर, पंचायत समिती सभापती सुखदेव चोरमले, कृषी.उ.बा.स. सभापती गणेश जगदाळे, दौंडचे मा.नगराध्यक्ष योगेश कटारिया, भीमा पाटस चे मा.व्हा.चेअरमन आनंद थोरात, मा.सभापती अप्पासाहेब पवार, संतोष बिरादार, तुषार रामराव पवार (प्र.कार्यकारी संचालक) हे उपस्थित होते. कार्यक्रमाचे सूत्रसंचालन भीमा पाटसचे संचालक विकास शेलार सर यांनी केले तर आभार मते यांनी मानले. यावेळी मोठ्या प्रमाणावर भीमा पाटसचे सभासद, संचालक मंडळ, शेतकरी बांधव, कामगार उपस्थित होते.
