दौंड : स्थानिक गुन्हे शाखा आणि दौंड पोलिसांनी चेन स्नॅचिंग करणाऱ्या दोन आरोपींना अटक करून तब्बल सहा गुन्हे उघडकीस आणले आहेत. आरोपींकडून ५५ ग्रॅम वजनाचे सोन्याचे दागिने आणि एक मोटारसायकल असा एकूण ९ लाख रुपयांचा मुद्देमाल हस्तगत करण्यात आला आहे. पुणे ग्रामीण पोलिसांच्या या कारवाईत दौंडसह यवत, वडगाव निंबाळकर आणि जेजुरी परिसरातील गुन्हे उघडकीस आले आहेत.
दौंड पोलीस ठाण्याच्या हद्दीत दाखल झालेल्या जबरी चोरीच्या गुन्ह्यांच्या अनुषंगाने पुणे ग्रामीणचे पोलीस अधीक्षक संदीपसिंह गिल यांनी स्थानिक गुन्हे शाखा आणि दौंड पोलिसांना गुन्हे उघडकीस आणण्याच्या सूचना दिल्या होत्या. त्यानुसार तपास पथकाने घटनास्थळे, गुन्ह्यांची वेळ आणि गुन्हे करण्याची पद्धत यांचा आढावा घेतला. समान कार्यपद्धतीच्या घटनांची माहिती एकत्रित करून गोपनीय माहितीच्या आधारे संशयितांचा शोध घेण्यात आला.
या तपासादरम्यान दीपक बलभीम पवार (वय २८, रा. आरोळे वस्ती, जामखेड, जि. अहिल्यानगर) आणि युवराज सचिन लोखंडे (वय २४, रा. उद्धट, ता. इंदापूर, जि. पुणे) या दोघांची नावे समोर आली. पोलिसांनी जामखेड येथून त्यांना ताब्यात घेत त्यांच्याकडे कसून चौकशी केली. पोलिसांनी केलेल्या या चौकशीत आरोपींनी दौंड पोलीस ठाणे, यवत पोलीस ठाणे, वडगाव निंबाळकर पोलीस ठाणे, जेजुरी पोलीस ठाणे हद्दीत तब्ब्ल सहा गुन्हे केल्याची कबुली दिली. आरोपींकडून सुमारे ५५ ग्रॅम वजनाचे सोन्याचे दागिने आणि एक मोटारसायकल असा एकूण ९ लाख रुपये किमतीचा मुद्देमाल हस्तगत करण्यात आला आहे.
सदरची कारवाई पुणे ग्रामीणचे पोलीस अधीक्षक संदीपसिंह गिल, अपर पोलीस अधीक्षक गणेश बिरादार, बारामती विभागाचे उपविभागीय पोलीस अधिकारी बापूसाहेब दडस यांच्या मार्गदर्शनाखाली स्थानिक गुन्हे शाखेचे पोलीस निरीक्षक प्रमोद क्षीरसागर, दौंड पोलीस ठाण्याचे पोलीस निरीक्षक हेमंत शेडगे, स्थानिक गुन्हे शाखेचे पोलीस उपनिरीक्षक ज्ञानेश्वर राऊत, दौंड पोलीस ठाण्याचे पोलीस उपनिरीक्षक शंकर वाघमारे, स्थानिक गुन्हे शाखेचे पोलीस अंमलदार सचिन घाडगे, आसिफ शेख, गुरुनाथ गायकवाड, सुभाष राऊत, राजू मोमीन, विकास कापरे, भारत मोहळ, चेतन पाटील, तसेच दौंड पोलीस ठाण्याचे पोलीस अंमलदार अंतुल पठाण आणि अंकुश दळवी यांनी केली असून गुन्ह्यांचा पुढील तपास दौंड पोलीस पोलीस करीत आहेत.
