केडगाव, दौंड : संपूर्ण राज्यात गाजत असलेल्या आणि मानवतेला काळिमा फासणाऱ्या ‘केडगाव गर्भलिंग निदान’ प्रकरणातील मुख्य आरोपिचे साथीदार असणाऱ्या आणि गर्भपात करणाऱ्या डॉ.संगीता गायकवाड (पार्थ हॉस्पिटल, केडगाव) तसेच गर्भलिंग निदान प्रकरणात बोगस डॉक्टर अण्णासाहेब गिरी याला मदत करणारी त्याची साथीदार सदिच्छा शिंदे यांना पुन्हा एकदा दौंड न्यायालयाने २४ जून पर्यंत पोलिस कोठडी दिली असल्याची माहिती यवत पोलिसांनी दिली आहे.
तोतया डॉक्टर अण्णासाहेब गिरी याचे ‘केडगाव गर्भलिंग निदान’ प्रकरण बाहेर आल्यानंतर यवत पोलिसांनी त्याला अटक केली. या प्रकरणाची अनेक जिल्ह्यापर्यंत व्याप्ती वाढू लागल्याने त्याचा तपास ‘एसआयटी’ कडे देण्यात आला. आत्तापर्यंत या प्रकरणात पुरुष डॉक्टर आरोपी म्हणून पुढे आले होते मात्र या प्रकरणाचा सखोल तपास सुरु झाल्यानंतर मात्र महिला डॉक्टर सुद्धा आरोपी म्हणून निष्पन्न होऊ लागल्या.
केडगाव येथील पार्थ हॉस्पिटलच्या डॉ.संगीता गायकवाड यांना अटक झाल्यानंतर यातील गिरीची मुख्य सूत्रधार आणि पैसे देवाणघेवाण करणारी महिला सदिच्छा शिंदे हिला अटक करण्यात आली. त्यांना प्रथम दोन दिवसांची पोलिस कोठडी सुनावण्यात आली होती मात्र तपासात अजूनही अनेक बाबी उघड व्हायच्या असल्याने या दोघींना पुन्हा २४ जून पर्यंत पोलिस कोठडी देण्यात आली आहे.
गर्भलिंग निदान होणाऱ्या त्या गोपनीय जागांपैकी केडगाव येथील हिडन रुमचीही मोठी चर्चा – गर्भलिंग निदान प्रकरण साखळीत गर्भापात करणाऱ्या डॉ.संगीता गायकवाड यांना अटक झाल्यानंतर गिरी याची साथीदार सदिच्छा शिंदे हिलाही अटक करण्यात आली. या दोघींच्या अटकेनंतर गर्भलिंग निदान हवेली तालुक्यातील शिंदवणे येथील फार्महाउस आणि सिताई हाके नगर येथील फ्लॅटवर गर्भलिंग निदान केले जायचे अशी माहिती समोर आली. मात्र हाच प्रकार केडगाव येथील एका हिडन रुममध्ये सुद्धा केला जायचा अशी चर्चा केडगाव परिसरात होत आहे.
त्यामुळे आता या हिडन रुम चा शोध लागणार का याकडे केडगावकरांचे लक्ष लागले असून नागरिकांमध्ये होत असलेल्या चर्चेतून ही रुम एका फ्लॅटच्या मेन हॉल ला लागून असून वरवर जरी ती संपूर्ण भिंत दिसत असली तरी त्यामध्ये एक हिडन रुम तयार करण्यात आली होती आणि त्यामध्ये सुद्धा गर्भलिंग निदान केले जायचे अशी चर्चा मोठ्या प्रमाणात होत आहे त्यामुळे आता तपास यंत्रनांना जर ही हिडन रुम सापडली तर या प्रकरणातील एक दडलेला काळा अध्याय समोर येईल यात शंका नाही.
