पुणे : पुणे ग्रामीण जिल्ह्यात जुनी वाहने खरेदी-विक्री करणाऱ्या सर्व व्यावसायिकांनी त्यांच्या व्यवहारांची माहिती संबंधित स्थानिक पोलीस ठाण्याला देणे आता बंधनकारक करण्यात आले आहे. यासंदर्भात भारतीय नागरीक सुरक्षा संहिता, २०२३ च्या कलम १६३ अंतर्गत प्रदान करण्यात आलेल्या अधिकारांचा वापर करून अपर जिल्हादंडाधिकारी ज्योती कदम यांनी आदेश जारी केले आहेत.
आदेशानुसार, पुणे ग्रामीण जिल्ह्यातील जुनी वाहने खरेदी-विक्री करणाऱ्या व्यावसायिकांनी प्रत्येक खरेदी-विक्री व्यवहाराची आवश्यक माहिती संबंधित स्थानिक पोलीस ठाण्यात सादर करणे आवश्यक राहील. या आदेशाचा उद्देश वाहन चोरी, फसवणूक तसेच इतर गुन्हेगारी प्रकारांना आळा घालणे आणि वाहन व्यवहारांमध्ये पारदर्शकता राखणे हा आहे.
या आदेशाचे पालन न करणाऱ्या व्यावसायिकांविरुद्ध भारतीय न्याय संहिता (BNS) कलम २२३ अन्वये दंडनीय कारवाई करण्यात येईल, असे स्पष्ट करण्यात आले आहे. तसेच, संबंधित स्थानिक पोलीस ठाण्यांनी या आदेशाची प्रभावी अंमलबजावणी करून आवश्यक ती कायदेशीर कार्यवाही करावी, असेही आदेशात नमूद करण्यात आले आहे.
